Татарстан төзүчеләре торак тапшыру буенча еллык планны арттырып үтәгән. 184 объект кергән тугыз программа инде тәмамланган. Алты программа һәм аларга керүче 13 объект тәмамланып килә. Төзелеш министрлыгы карамагындагы 8 илкүләм проектка һәм 4 дәүләт программасына барлыгы 116 объект керә. Мамадыш районының Кече Сон авылында да капиталь ремонттан соң мәктәп ачтылды. Көзге каникуллардан соң ук 2-9 нчы сыйныф укучылары яңартылган сыйныфларда укуларын дәвам итә алдылар. 1997 елда төзелгән мәгариф учреждениесендә моңа кадәр ремонт ясалмаган була. Шуңа күрә бу вакыйга һәркем өчен көтелгән иде.
Радмир Аптекиев бүген капиталь ремонттан соң беренче тапкыр үз сыйныфына керә. 4 нче сыйныф укучысы өчен дә, аның сыйныфташлары кебек үк, бу көтеп алынган көн. Уку елын башка бинада башларга туры килә аларга.
Бинаны өч ай эчендә тулысынча яңартырга өлгерәләр. Мәктәп директоры Тәнзилә Сәйфуллина әйтүенчә, 2022 елда мәгариф учреждениесенең «мәгариф мохитен үстерү» программасына керүе турында аңа 29 июльдә эйтәләр.
Казан төзүчеләре сынатмаган-эшләрне вәгъдә ителгән вакытка өлгерткәннәр. Капиталь ремонт 50 миллион сумга төшкән, шуларның 11 миллионы җиһазлар сатып алуга тотылган.
Хәзер мәктәп эчендә җылы якты. Укучылар, укытучылар көтеп алынган ремонтка бик шат.
30 укучысы булган мәктәпкә бу масштабта капиталь ремонт ясалачагына алар ахырга кадәр ышанмаган.
Алия Галиуллина, Ландыш Бабаниязова, Фаил Шәйхетдинов, Татарстан яңалыклары, Мамадыш районы.
