Буаның 111нче янгын сүндерү бүлеге техника ягыннан тулыланды. Бу көннәрдә биредә заманча җиһазландырылган КамАЗ һәм “ЗИЛ” машиналары базасында эшләнгән автобаскычлы янгын сүндерү автомобилләре кайтты. Билгеле, матди-техник базаның ныгуы, янгын сүндерүчеләргә гадәттән тыш хәл очракларында нәтиҗәләрәк эшләргә мөмкинлек бирәчәк.
Көчле сирена тавышы көннең теләсә кайсы вакытында аваз салырга мөмкин, шуңа да техниканың һәрвакыт әзер һәм төзек булуы мөһим. Заманча җиһазландырылган КамАЗ машинасы инде өч тапкыр янгынга чыгарга өлгергән, беренче сынауны уңышлы узган. Ышанычлы техника булуын күрсәткән.
Шәхси составның да яңа КамАЗ турында фикере яхшы.
Ут белән көрәшүчеләрнең тагын бер “булышчысы” — “ЗИЛ-” машинасы базасында эшләнгән автобаскычлы
янгын сүндерү автомобиле. Анысына ихтыяҗ күптәннән булган, чөнки команда озак еллар биек биналарда аерым баскыч белән эшләргә мәҗбүр булган.
Ышанычлы янгын сүндерү техникасы эшне җиңеләйтсә дә, һәр минут саен гомерләрен куркыныч астына куярга әзер булган ир-егетләрнең хезмәтен бәяләми мөмкин түгел. Бүгенгә биредә 52 янгын сүндерүче эшли. Көн саен каравылга 10-12 кеше килә.Нәтиҗәләрнең яхшы якка үзгәрүен дә билгеләп үтергә кирәк.
Районга яңа техника бирелү, әлбәттә куанычлы. Тик ул җылы бокста ешрак хәрәкәтсез торсын, халык куркынычсызлыгы сагында торучыларга эш азрак булсын дип телисе килә.
