Бу көннәрдә күренекле татар журналисты, җәмәгать эшлеклесе Шәех Зәбировны искә алдылар. Әлеге чара Казанның”Дворянское Гнездо” ресторанында үтте. Исән булса, Шәих Зәбировка 90 яшь тулган булыр иде. Искә алу кичәсеннән- Фәннур Хәсәнов репортажы.
Татар матбугатының алтын баганасы, 50 елдан артык гомерен «Яшь Ленинчы», «Татарстан яшьләре», «Шәһри Казан», «Мәдәни җомга», бигрәк тә чирек гасырга якынын «Социалистик Татарстан» («Ватаным Татарстан») газетасында, армый-талмый, дәртләнеп, кайнарланып, яратып, сөенеп хезмәт иткән, 17 ел рәттән «Татар мөселман календаре»н чыгарган Шәех Зәбиров(Миншәех Харис улы Зәбиров)ны искә алу кичәсе бик җылы башланып, матур истәлекләр белән үрелеп алып барылды.
Шәех исеме берничә мәгьнәгә ия. Беренче очракта ул юлбашчы дигәнне белдерә. Икенче урында «шәех» сүзе дәрәҗәне аңлата һәм ислам диненә хезмәт иткән зур шәхес, акыл иясе дип билгеләмә бирелә.
Бәйрәм барышында, һәр чыгышта да , ул бик күп изгелек, яхшы эшләр эшләде, күп китап, дини календарьлар чыгарып, халкыбызга хезмәт итте, кешеләр өчен яшәде, кешеләр дә аны ярата иде,- дигән сүзләр яңгырап торды.
Искә алу кичәсендә Татарстан Язучылар берлегеннән язучылар, шәгыйрь- шагыйрәләр, дин әһелләре, Шәех Зәбировның якташлары, дуслары, туганнары катнашты.
Фәннур Хәсәнов, Иван Худяков, Татарстан яңалыклары.
