Яңалыклар тапшыруының җомга чыгарылышын “Идел буе Болгар дәүләтендә ислам дине кабул ителүнең 1100 еллыгы”на багышланган даими сәхифә белән дәвам итәбез. Сүзне хезмәттәшем Мөршидә Җиһанга бирәм.
Әссәләмегаләйкем вә рәхмәтуллаһи вә бәрәкәтүһү, хөрмәтле дин кардәшләр. Хиҗри календарь белән исәпләгәндә Рабигыйль-ахыр ае башланып китте. Дини чыганакларга караганда бу айда мөэмин-мөселманнар салаватлар әйтеп, Мәүлет мәҗлесләре үткәрүдә катнашкан. Ислам вәзгытендәге үзгәрешләр әлеге традицияләрне яңарта. Казан шәһәре филармониясе Пәйгабәребез Мөхәммәд саллалаһу галәйһи вә-сәлам туган көненә багышлап Мәүлид бәйрәме оештырды. Дини кичә «Чулпан» мәдәният үзәгендә узды. Билет сатудан кергән акчаларның 50 проценты “Приют человека” хәйрия фондына тапшырылды.
***
Шушы көннәрдә Казанда зурлап үткәрелгән тагын бер чараны барлап узыйк. Ул да булса — мөселман белем бирү оешмалары мөгаллимнәренең Бөтенроссия форумы. 2011 нче елдан бирле үткәрелеп килгән әлеге чарада катнашучылар дини белем һәм тәрбия өлкәсендәге мөһим мәсьәләләр турында фикер алыша. Ике көнлек форумның төп вакыйгасы –“Мөхәммәдия” мәдрәсәсенең 140 еллыгына багышланган конференция. Яңартылган бинада беренче тапкыр уздырылаган фәнни чараны иҗат төркеме белән без дә күреп кайттык.
Юбилей уңаеннан үткәрелгән конференцияне Татарстан мөфтие Камил хәзрәт Сәмигуллин ачты.
Җыенда Мөхәммәдия мәдрәсәсе җитәкчеләре, дини уку йортларныда белем бирүчеләр һәм Бөтенроссия мөселман мәгариф оешмалары мөгаллимнәре форумы кунаклары катнашты.
Галим Марат Гыйбатдинов мәдрәсәләрнең мәгариф системасындагы ролен ачыкласа, Зөлфәт хәзрәт Габдуллин җентекләп Мөхәммәдия мәдрәсәсе тарихын өйрәнгән.
Мөхәммәдия мәдрәсәсен тәмамлаган шәкертләр төбәкләрдә мөфти, имма-хатыйб вазыйфаларын башкара. Дини белем баскычлары аша алмашка яңа буын да югары гыйлемгә омтыла. Араларында Чувашстан һәм Пенза өлкәләренннән килүчеләр дә бар.
Татарстанда һөнәри ислам мәгарифе проблемалары турында фикер алышу конференциясендә район һәм авыл мәдрсәләрендә укытучы абыстайлар да катнашты.
Районнарда башлангыч дини белем алучыларның күбесе Мөхәммәдия мәдрәсәсендә укуын дәвам итә. Хәзер биредә тагын да мөкинлекләр , шартлар күбрәк. Яңа бинаның үзенчәлеге шунда биредә намаз ук бүлмәләре, конференция залы, кызлар өчен тулай торак урнашкан.
Ә иң мөһиме биредә ислам мәгарифе , гомуммән дини мәсәләләр белән бәйле фәнни-гамәли чаралары үткәрү мөмкинлекләре булдырылган. Мәдрәсә юбилее уңаеннан үткәрелгәне шуның нәтиҗәле башлангычы.
***
Саубуллашканчы тагын бер кирәкле мәгълүматны искәртеп үтик. Киләсе елда рамазан ае 23 мартта башлана. Ә Ураза бәйрәме 21 апрельгә туры килә. Шушының белән һәрбарчагызга исәнлек – саулык теләп саубуллашам. Әссәләмегаләйкем вә рәхмәтуллаһи вә бәрәкәтүһү.
