Россиядә 1 гыйнвардан аз керемле гаиләләр өчен универсаль пособие бирелә башлый. Башка социаль түләүләрдән ул үзгәме, аның нинди өстенекләре барлыгына бәйле сорауларга җавапны хәбәрчебез Мөршидә Җиһан җиткерер.
Киләсе елдан алты төр ярдәмне үз эченә алган универсаль пособие гамәлгә кертелә. Бу элеккеге социаль түләүләрне бетереп , яңасын билгеләү түгел, Ә гамәлдәге социаль ярдәм чараларын берләштерү дип белдерде Россия Пенсия фондының Татарстан бүлеге идарәчесе Эдуард Вафин. Балалары булган гаиләләргә, йөкле хатын-кызларга бердәм универсаль пособие кертү турындагы чыгышында
кайбер норматив-хокукый актларга өстәмә үзгәрешләр кертелүен һәм кемнәргә бирелүен аңлатты.
Универсаль пособие Йөклелекнең башлангыч чорында медицина оешмасында теркәлгән хатын-кызларга; Мәҗбүри социаль иминиятләштерү үтмәгән яшь ярымга кадәр баласы булган әниләргә; Беренче бала туган әниләргә яисә тәрбиягә бала алучыларга; Икенче баласын тапкан әниләргә яисә тәрбиягә бала алучыларга; Өчтән җиде яшькә кадәр балалары булучыларга; Сигез яшьтән 17 яшькә кадәр балалары булучыларга бирелә.
Пособиенең күләме Татарстан Республикасында баланың яшәү минимумына бәйле. Ул — 11 852 сум. Димәк, бала өчен айлык түләү – 5 926 сум. Гаиләнең җан башына гомуми уртача кереме бер кешегә яшәү минимумыннан кимрәк булса түләү күләме 75 процентка, ягьни 8 899 сумга кадәр арта.
Универсаль пособие бер кешегә яшәү минимумыннан исәпләнә. Ул 12 219 сум. Ә бу исә гаиләнең бер әгъзасына уртача исәпләнгән еллык керем -146 628 сумнан артмаска тиеш дигән сүз.
Барлыгы 152 мең кешегә ярдәм итү фаразлана дип белдерелде Министрлар Кабинетында узган брифингта чыгыш ясаучылар. Шулай ук универсаль пособие өчен акча бүленешенә дә ачыклык кертелде.
Пособиеләрне рәсмиләштерү өчен гаризаны үзгәрешләр булмаса бер тапкыр гына бирү дә җитә. Аны дәүләт хезмәтләренең бердәм порталы , күп функцияле үзәк аша бирергә һәм Социаль фондның җирле бүлекчәләре аша шәхсән мөрәҗәгать итеп тапшырырга мөмкин.
Мөршидә Җиһан, Ралина Абрамова, Александр Решеткин Татарстан яңалыклары.
