Сочи шәһәрендә узган “Без бергә.Спорт.” халыкара параолимпия ярышларында Саба районы спортчылары да катнашты. Кемнәр җинү яулады? Алдагы язмада.
Сочида үткән паралимпия уеннарында Россиянең 78 регионыннан, 10 чит илдән 1200 спортчы катнашты. Алты көндә 9 спорт төре буенча 369 комплект медаль уйнатылган. Шәмәрдәннән Риана Имамиева Саба Аренага атнасына өч тапкыр килеп өстәл теннисы белән шөгыльләнә. Призерлар исемлегенә керә алмаса да , аның җиңүгә омтылышы бик зур иде . Тренеры Фарход Исмаилов та аңа зур өметләр баглый.
Раил Галиәкбәров исеме дә саба районы халкына бик яхшы таныш. Максатчан рәвештә ул 10 елдан артык инде өстәл теннисы белән шөгыльләнә. Сочидагы уеннарда исә парлы разрядта 3 нче урынны алуга иреште.
Елена Гороховатченко, Екатерина Ищенко, Сафира Фәйзетдинова, Элина Шәйдуллина, Владимир Богданов,Ранис Закировларның призер булулары да сөендерә. Күп ярышларда катнашучы , бик актив яшәү рәвеше алып баручы якташыбыз Ләйсән Зарипова җиңүгә омтылыш өчен бүләккә лаек була. Тренерлары Фарход Исмаилов спорт ул кешегә чикләнмәгән мөмкинлекләр бирә дип исәпли.
Безнең 7 спортчы 12 медаль яулады. Барысы диярлек Саба районыннан, 1 егет Балык Бистәсеннән.Бөтенесе Татарстан Республикасын тәкъдим итте. Безне һәрвакыт дуслык берләштерде, һәрвакыт шулай булсын иде.
Фарход Исмаилов һәрвакыт зур максатлар куеп эшли , Сабада адаптив спорт үзәге ачу кирәклеге турында фикер йөртә. Очрашуда Саба районы яшьләр эшләре һәм спорт бүлеге җитәкчесе Ирек Гарипов спортчыларны җиңүләре белән тәбрикләп , истәлекле бүләкләр тапшырды.
