Татар дөньясына, әһәмиятле өлеш керткән шәхесләребез байтак. Бүген 18нче октябрьдә драматург, артист, Татарстанның сәнгать эшлеклесе Юныс Сафиуллинга 75 яшь.Ул узган гасырның туксанынчы елларыннан башлап Татарстан телевидениесе һәм радиосы аша театр яңалыклары, күренекле артистлар, режиссерлар турында даими тапшырулар алып баруы һәм көндәлек матбугатта басылган күпсанлы мәкаләләре, иҗат портретлары белән дә тамашачылар һәм укучылар даирәсенә яхшы таныш.
Юныс Габдулла улы Сафиуллин 1947нче елның 18октябрендә Татарстанның Яшел Үзән районы Бакырчы авылында туа. Акъегет сигезъеллык урта мәктәбен тәмамлагач, 1962 елда Казан театр училищесына укырга керә, аны 1966 елда уңышлы тәмамлый. Шуннан Республика күчмә театрына эшкә билгелиләр. Шул ук елда Совет Армиясенә хезмәткә алына, хезмәтен тутырып кайткач, янәдән Күчмә театрда актёр булып эшли. 1976 елда А. В. Луначарский исемендәге Мәскәү дәүләт театр сәнгате институты (ГИТИС) каршында режиссёрлар хәзерләүче икееллык Югары курсларны тәмамлый һәм 1981 елга хәтле Казан драма һәм комедия театрында актёрлык эшен дәвам иттерә. 1981 елның февраленнән 2008 елга кадәр Г.Камал исемендәге Татар Дәүләт академия театрында башта актёр, аннары театрның әдәби бүлек мөдире булып эшли.. Юныс Сафиулланың егермедән артык сәхнә әсәре бар. Автор үз әсәрләрендә бүгенге һәм киләчәк буыннар турында уйлану, мәхәббәт һәм гаилә мөнәсәбәтләренә җитди караш халыкны тирәнтен кызыксындыра һәм борчый торган актуаль мәсьәләләрне күтәрә һәм шуларны үзенчәлекле сәнгать чаралары, әдәби образлар ярдәмендә үтемле итеп әйтеп бирергә омтыла.
