Берләшеп кенә җиңүгә ирешеп була. Мамадыштан гуманитар ярдәмнең чираттагы партиясе китте. Бу юлы йөк турыдан-туры «Алга» һәм «Тимер» батальоннары хезмәткәрләренә адреслана. Әлеге изге эштә шәһәр һәм районда яшәүчеләр дә, предприятиеләр дә, оешмалар да, фермер хуҗалыклары да, авыл җирлекләре дә катнашты. Тулырак мәгълүмат — киләсе сюжетта.
Гуманитар йөкне төяүдә «Тимер» батальоны хәрби хезмәткәре, мамадышлы Николай да катнаша. Ул август ахырында контракт төзегән, берничә хәрби белгечлеге бар. Аның сүзләренчә, солдатларга медикаментлар һәм кием кирәк.
Гуманитар ярдәм җыюда районның барлык авыл җирлекләре, эре предприятиеләр, мәгариф учреждениеләре, гади халык катнаша. Район җитәкчелеге башкаларны да бу эштә катнашырга чакыра. Берләшеп кенә явызлыкны тизрәк җиңеп була.
Башта өч районнан җыелган гуманитар йөкләрне бер зур машинага төяп җибәрергә уйлыйлар. Әмма район башлыгы Анатолий Иванов инициативасы белән Мамадыш районыннан аерым гуманитар ярдәм тутырылган фура инде өченче тапкыр җибәрелә. Бу юлы зур йөк депутат Булат Газизов һәм Эдуард Шәрәфиев озатуында барачак. Бу кешеләр гуманитар ярдәм әзерләүдә дә, аны адресатларына илтүдә дә зур көч куялар. Шулай ук олы яшьтәге кешеләрнең эчкерсез ярдәме тирән хөрмәткә лаек.
Район җитәкчелеге хәрби хезмәткәрләрнең гаиләләрен дә онытмый. Аларның һәрберсенә кирәкле ярдәм күрсәтеләчәк. Мондый гаиләләргә җитәкчеләр, фермерлар, яисә авыл җирлекләре башлыклары беркетелгән.
Ләлә Зәйнуллина, Фәүзия Нургалимова, Тимур Мөхәммәтханов, Фаил Шәйхетдинов. Мамадыш районыннан Татарстан яңалыклары өчен.
