Өлкәннәр ун көнлеге уңаеннан Апас Мәдәният йортында Татарстанның халык артисты Илсур Сафин тамашачыларны сөендереп концерт куйды. Шулай ук әлеге чара җырчының юбилей уңаеннан да оештырылды. Бәйрәм мизгелләрен хәбәрчебез Динә Нәҗметдинова да күреп кайтты.
Илсур Сафинның бала чагы Югары Балтай авылында уза. Дүрт чакрым ераклыктагы Урта Балтай мәктәбендә белем ала. Җырчының әнисе янгыравык моңлы тавышлы була, әтисе тальянда уйный. Беренче тапкыр 9 нчы сыйныфта сәхнәгә карата мәхәббәте уяна һәм 10нчы сыйныфтан соң Казан Дәүләт Консерваториясенең вокал бүлегенә укырга керә. Шул вакыттан соң тулысынча иҗатка гашыйк була.
Илсур Сафин үзенең юбилей кичәсен туган ягында уздырырга була һәм форсаттан файдалынып барлык әби-бабайларны өлкәннәр көне белән тәбрик итә. Танылган җырчы ике сәгать дәүрендә барлык тамашачыларны үзенең моңлы тавышы белән куандырды.
Шулай ук җырчыны гомер бәйрәме белән Апас районы башлыгы да котлады.
Илсур Сафин турында дуслары, шактый еллар бер сәхнәдә чыгыш ясаган артистлар юбилярның бик күп уңай сыйфатларын ассызыклый. Кирам Сатиев шуларның берсе.
Динә Нәҗметдинова, Таһир Хәсәнов, Татарстан яңалыклары.
