2 нче октябрьдә, 50 елга якын телевидениедә оператор булып эшләгән Таһир Хәсәнов мәңгелеккә арабыздан китеп барды.
Хезмәттәшебез кайда барса да үз кеше иде. Эшен зур җаваплылык белән яратып башкарды. Төшерергә барган җирдән Таһир Хәсәновны әллә кайдан күреп алып сәясәтчеләр, әдәбият-сәнгать әһелләре кул биреп исәнләшәләр иде. Телевидение белән ул 10 нчы интернат-мәктәптә укып йөргән чакта ук таныша.Сыйныфташлары белән төрле чараларда катнашып йөри. Армиядән кайтуга Татарстан дәүләт телевидениесенә ут куючы булып эшкә урнаша. Аннан ассистент,оператор,өлкән оператор вазыйфаларын башкара. Сюжет, репотажлардан тыш, телевидение архивында ул төшергән күләмле тематик тапшырулар, телевизион фильмнар да бар.Яратып башкарган эшенә Таһир Хәсәнов улы Ленарны да өйрәтеп калдырды. Ул студия операторы буларак әтисе эшен дәвам итә. Татарстан дәүләт телеракомпаниясе исеменнән Ленарның һәм гаиләсенең, якыннарының авыр кайгысын уртаклашабыз. Соңгы юлга озату мәрасиме 3нче октябрьдә 15нче хастаханә янынан көндезге сәгать 12 дә була. Таһир Хәсәнов туган авылы Лаеш районының Атабай авылы зиратына җирләнә.
