Хәерле көн, мөхтәрәм телевизор караучылар! Күпертелгән hәм бөтенләй шыр ялган хәбәрләр белән тулган дөньяда яшәгәндә сыйфатлы татар матбугатының кирәклеге тагын да ачыграк күренә. Әйдәгез, бергәләп татар дөнясындагы газета –журналларга күзәтү ясыйк.
Тормыш катлауланган саен ярдәмгә мөхтаҗ катлам арта. “Татарстан яшьләре” газетасы менә шундый чарасыз калган кешеләргә булышуны үзенең бурычы итеп алган “Социаль тернәкләндерү hәм адаптация” оешманың эшләре белән таныштыра. Ул оешманың җитәкчесе Азат Гайнетдинов-үзе дә тугыз бала атасы, берничә елдан бирле көчле команда туплап, дәүләт оешмалары белән кулга-кул тотынып, башка төбәкләрдә яшәүчеләрне сокландырырлык итеп социаль ярдәм системасы булдырган. Бер оешма гына да шул кадәр сәваплы эшләр башкара ала икән, ил күләмендә нинди эшләр майтарырга булыр иде дип уйлап куясың бу язманы укыганда. Барыбызның да шундый саваплы эшләргә катнашы булсын иде, җәмәгать!
Ләкин тормышта гел алай гына түгел икән шул. Без сайлаган депутатлар еш кына каш ясыйм дип күз чыгарып утыралар. “Шәhри Казан” газетасы Дәүләт Думасының бу ел азагына кадәр бала- “табып үстерү, ә традицион гаилә кыйммәтләренә каршы булучыларны штрафка тарту турындагы закон проектын кабул итәргә җыенулары турында хәбәр итә hәм ни өчен бүген күп гаиләләрнең балалы буласы килми дигән сорауга җавап эзли. Кешене ирексезләп бәхетле итеп булмый- җавап менә шундый.
Безнең халыкта әлифне таяк дип белмәүчеләр булмаган диярлек. Чөнки динебез безгә туганнан башлап үлгәнчегә кадәр гыйлем өстәргә куша. Татарны заманча белемле, мәгърифәтле итүгә бихисап зур өлеш керткән данлыклы “Мөхәммәдия” мәдрәсәсе турындагы язманы “Безнең мирас” журналының сентябрҗ саныннан укырга була. Аны үзе дә заманында шул югары уку йортын тәмамлаган бөекләребезнең берсе-Бакый ага Урманче язган.
Журнал шул ук “Мөхәммәдияне” тәмамлаган тагын бер тарихи шәхес-Таhир Ильясиның сәяхәтнәмәсен дә бастырган. Таhир Ильяси Идел-Урал төбәгендәге ачлык чорында халыкны коткару өчен зур көч куйган шәхесләребезнең берсе. Мәгълүмәтле дә, гыйбрәтле дә язма.
Бүген бөтенебезгә дә кагылган проблема-өлешчә мобилизация. Украинада бара торган операциядә катнашу өчен хәрби хезмәткә чакыруның нечкәлекләре белән “Ватаным Татарстан” газетасында танышырга була. Анда шулай ук Татарстан Республикасы хәрби комиссарының боерыгы да басылып чыккан. Имеш-мимешләргә ачыклык кертәсегез килсә, менә шушы документны укып чыгарга тәкъдим итәр идем.
Ә инде дөньяның кая барганлыгын беләсегез килсә, газетаның сәяси күзәтүчесе Рәшит Фәтхрахманов язмасын укып чыгарга кирәктер. Анда фәлсәфи сорауга бик төгәл җавап ярылып ята. Автор язганча, бәяләр төшсен, гаделсезлекләр тукталсын өчен үзебез, игелек эшләп кенә калмыйча, моңа башкаларны өндәргә, тыелганнардан тыелырга тиешбез. Шундый теләктә бүгенгә сезнең белән саубуллашам. Исәнлектә күрешик!
