17 тоннадан артык азык-төлек. Мамадыш районында Донецк һәм Луганск өлкәләрендә яшәүчеләр өчен чираттагы гуманитар ярдәм туплау бара. Яшелчә, ярмалар, бал, шәхси гигиена чаралары озакламый адресатларына тапшырылачак. Изге, саваплы эшкә Мамадыш халкы бик теләп кушылды. Ярдәм итүчеләрнең берсе белән Мамадыштагы хәбәрчебез Илнур Юнысов да очрашып кайтты.
Василий Архипов хезмәт юлын умартачылык өлкәсенә багышлаган шәхес. Бу һөнәрнең серләренә әти-әнисеннән өйрәнгән. Алар да Мамадышның күренекле умартачылары иде. Сюжет герое бүгенге көндә Яковка авылыннан ерак түгел җирдә 120 баш корт гаиләсе тота. Быелгы сезонда шулардан 2 тонна продукция алган. Хуҗалыкта аңа гаиләсе һәм туганнары ярдәм итә.
Авыл җирлеге башлыгы Донецк һәм Луганск өлкәләре халкы өчен гуманитар ярдәм итеп бер банка бал бирү тәкъдимен әйткәч, Василий Архипов бик теләп риза була. Ә гаилә советында шул хакта сөйләшкәч, 3 литр урынына бер бидон итәргә карар кылалар.
55 килограмм авырлыктагы бер бидон балны Василий Архипов район хакимияте бинасы ишегалдына алып килде. Мондагы гаражлар вакытлыча гуманитар ярдәмне җыю урыны ролен үти. Бүгенге көндә Мамадыш халкыннан 17 тоннадан артык продуктлар җыелган. Бәрәңге, суган, кишер белән чөгендер, кабак, бал, төрле ярмалар, шәхси гигиена кирәк-яраклары… Авыл җирлекләре, оешмалар, бюджет учреждениеләре зур активлык күрсәтә.
Озакламый җыелган гуманитар ярдәм Донецк һәм Луганск өлкәләре халкына озатылачак. Бу изге эшкә өлеш кертергә теләүчеләр район башкарма комитетының территориаль үсеш бүлегенә мөрәҗәгать итә ала.
Илнур Юнысов, Алмаз Камалиев, Фаил Шәйхетдинов.
