Әссәламегаләйкем вә рәхмәтуллахи вә бәрәкәтүхү.
Россия ислам институтында “XI Якупов укулары” үткәрелде. Быел фәнни –гамәли чара “Мөхәммәдия” мәдрәсәсенең 140-еллыгы, Идел буе Болгар дәүләтендә Исламны кабул итүнең 1100-еллыгына багышлап уздырылды. Татарстан мөфтияте, Россия ислам институты, Казан ислам университеты һәм “Мөхәммәдия” мәдрәсәсе тарафыннан оештырыла. Конференция барышында танылган дин әһелләре, галимнәр, дәүләт һәм җәмәгать эшлеклеләре Вәлиулла хәзрәт хакында истәлекләре белән уртаклаша, аның фәнни һәм дини мирасын өйрәнү һәм яшь буынга җиткерү буенча чыгышлар ясады.
****
Мәчет- ул Аллаh йорты! Тарихта да авылларның дәрәҗәсе аның мәчет-мәдрәсәсе булуы белән билгеләнгән. Буа районының Исәк авылында яңа мәчет 1998 елда төзелгән.
Мәчет чагыштырмача яңа булса да авылның тарихы озын. Беренче чыганаклар 1686 ел белән теркәлә. Мәчет каршында 1834 елда мәдрәсә дә ачыла. Исәк авылында заманында 2 мәчет, 2 мәктәп, 2 җил тегермәне, ярма яргыч, 2 вак-төякләр һәм 4 бакалея кибете эшләгән була. Бүгенге авыл тормышы элеккегедәй гөрләп тормаса да яңарышта. Иман йортыннан иңгән нур ярдәм итә күрәсең.
Көндәлектә җәмгать намазларына йөрүчеләр азрак булса да , җомгага арта ди авыл имамы Харис хәзрәт.
Исәк мәчетендә ел саен төбәкара мөнәҗәт фестивале үткәрелә. Яңа Тинчәледән Зәүҗия Төхвәтуллина берсен дә калдырмый, катнаша.
Дини һәм мәдәни оешмаларның бергәләп эшләве нәтиҗәсендә Исәк авылында тәрбияви-әхлакый чаралар даими үткәрелеп килә.
Бүгенгә чыгарылышыбыз тәмам. Иман йортларыннан азаннар яңгырап торсын. Әссәламегаләйкем вә рәхмәтуллахи вә бәрәкәтүхү.
