Татарстан Республикасы көне күңелле вакыйга — Габдулла Тукай исемендәге Татар дәүләт филармониясе скверында танылган җырчысы, татар һөнәри эстрадасына нигез салучы, ТАССРның халык артисты Рәшит Ваһаповка һәйкәл ачу тантанасы белән башланып китте. Тулырак Ләлә Зәйнуллина сюжетында.
Казанның нәкъ уртасында бөек җырчыбыз Рәшит Ваһаповка һәйкәл ачылды. Вафатына 60 елдан соң, Татарстан Рәшит Ваһаповны милли каһарманы итеп шушы биек пьедесталга бастырды. Һәйкәле дә, җырчыбызның үзе кебек затлы, матур. Тантаналы чарада Татарстан Республикасы Президенты Рөстәм Миңнеханов, Түбән Новгород өлкәсе вице-губернаторы Олег Беркович катнашты.
Һәйкәл җырчының сәхнә образын гәүдәләндерә. Биеклеге биш метр. Авторы-Россия Рәссамнар берлеге идарәсе рәисе, Россия Федерациясе халык рәссамы Андрей Ковальчук, һәйкәлне урнаштыру эскиз проекты Россия Федерациясенең Атказанган архитекторы Герман Бакулин тарафыннан эшләнгән, һәйкәлне ясатуны — Рәшит Ваһапов фонды директоры Рифат Фәттахов башлап йөргән.
Һәйкәлнең шушы паркта урнашуы юкка түгел, чөнки 1941 елда Рәшит Ваһапов иҗади эшчәнлеген Татар дәүләт филармониясендә башлап җибәргән. Паркта бар җиһанга Рәшит Ваһапов җырлары яңгырап торды. Тантанага шактый халык җыелды. Араларында танылган язучылар, шагыйрьләр, җырчылар бар иде.
Һәйкәле ачылышына аның туган ягы Түбән Новгородтан да кунаклар катнашты.
Һәйкәл ачу тантанасы скверда Ваһапов фестивале лауреатлары концерты белән тәмамланды.
Ләлә Зәйнуллина, Владимир Юрков, Татарстан яңалыклары.