Республиканың күпчелек районнарында сабан культуралары уңышын урып-җыялар. Сарман районында уракта җирле аграр көллият студентлары да катнаша. Яңа уку елы башланганчы ук, алар җитештерү практикасын узалар, кырларда механикалаштыру нигезләрен өйрәнәләр. Яшь комбайнчылар белән хәбәрчебез дә аралашып кайтты.
700 гектардагы уку-тәҗрибә кырында җанлылык. Биредә һәр студентка «Техник-механик» курсын яхшы итеп үзләштерү өчен барлык мөмкинлекләр дә бар. Студентлар төрле авыл хуҗалыгы машиналарын, комбайнны иярли, кырда практик күнекмәләр ала.
Айнур Гафуров һәм Данил Галимов — әзер комбайнчылар инде. Көллиятне тәмамлап, диплом аласылары гына калган. Аларны район хуҗалыкларында даими эшкә көтәләр.
Механизаторларга комбайннарның төрләрен генә белеп калмыйча, йөк машиналарында йөрергә, тракторларда басуларны сөрергә дә өйрәнергә кирәк.
Быелгы мул уңышка яшь комбайнчылар гына түгел, остазлары да сөенә. Басуга чыкканчы нинди механизмнарны тикшерергә, нинди тизлек белән узарга кирәклеген алдан ук билгелиләр.
Бу басуда студентлар һәр гектардан 40 ар центнердан артык ашлык үстергән. Тәҗрибәле игенчеләр көнләшерлек күрсәткеч. Сарман студентлары да яшь комбайнчыларның «Хезмәт кешесен данлыйбыз» 14 нче республика конкурсы финалына чыгарга дәгъва итә. «Татарстан» дәүләт телерадио компаниясе аны рспублика авыл хуҗалыгы һәм азык-төлек министрлыгы, Казан дәүләт аграр университеты белән бергә уздыра. Җиңүчеләрнең исемнәре октябрь аенда игълан ителә.
Дима Второв, Альберт Сафиуллин, Илдар Сафиуллин, Татарстан яңалыклары, Сарман районы.
