Татарстан кырларында бөртеклеләрне урып-җыю дәвам итә. Икмәк мул, шуңа да комбайннар кырларда бик түбән тизлектә эшли. Ә күп кенә районнарда игенчеләргә суктырган ашлык күләменә карап, акчалата премияне кырга ук китереп бирәләр. Арча районында да игенчеләрнең хезмәтен лаеклы бәялиләр. Районда бер гектардан 37 центнер уңыш чыга.
Арча районы игенчеләре кырлардан 100 мең тоннадан артык ашлык җыеп алдылар. «Ак барс-агро» хуҗалыгында 11 экипаж эшли. Урып-җыю көннән-көн кыза, комбайннарны урып-җыюга сыйфатлы итеп әзерләгәннәр. Хәзер барлык көч уракны тиз арада тәмамлауга юнәлдерелгән.
Механизаторлар арасында яшь комбайнчыларның «Хезмәт кешесен данлыйбыз» республика конкурсы финалына чыгу өчен көрәш кыза. Иң уңган яшь егет-кызларга акчалата пермияне кырда ук бирәләр. Шуларның берсе-19 яшьлек Ринас Туктаров. Комбайнчы ярдәмчесе булып 6 сыйныфтан бирле эшли, аннары үзе штурвалны иярли.
Арча районында урак 20 көн дәвам итә. Биредә ашлык җыюны сентябрьнең беренче декадасында төгәлләргә ниятлиләр. Тулаем алганда, Татарстанда 3 миллион ярым тоннага якын ашлык җыелган.
Дмитрий Второв, Александр Решеткин, Татарстан яңалыклары, Арча районы.
