Мәшһүр тарихчыбыз Ризаэтдин Фәхретдин инде VII гасыр ахырында VIII гасыр башында ук Идел буенда Ислам дине тарала башлаган дип яза. Әмма киләсе сәхифәбез тарихны түгел, ә бүгенге вәзгыятьне чагылдыра. Сүзне хезмәттәшем Мөршидә Җиһанга бирәм.
Әссәламегләйкем вә рәхмәтуллаһи вә бәрәкәтүһү. Хөрмәтле, дин кардәшләр!
Татарстан район һәм шәһәрләрендә Корбан гаете уңаеннан атна дәвамында шәһәркүләм гаилә бәйрәмнәре үткәрелде. Шуларның берсе — «Корбан Фест» гаилә фестивале традиция буенча Казанның Горький исемендәге Үзәк мәдәният һәм ял паркында узды.
Якшәмбе, 17нче июльдә Балтач районы Бөрбаш авылында XV Мөселман балалар Сабантуе оештырыла. Әлеге чара Татарстан Республикасында балалар өчен Корбан бәйрәме уңаеннан үтүче иң зур чараларның берсе.
Балалар өчен сабан туе , Ә яшьләр өчен ай ахырында Идел буе Болгар дәүләтендә ислам динен кабул итүнең 1100 еллыгына багышланган Бөтенроссия мөселман яшьләре форумы уздырыла. Анда Россиякүләм һәм якын һәм ерак чит илләрдән делегатлар катнашырга теләк белдерде. Мөселманнарның бер атнага исәпләнгән күчмә җыены Болгарда палаткалар шәһәрчегендә үткәрелә. Яшьләр җыены Россия өммәте файдасына социаль проектлар булдыру һәм аларны гамәлгә ашыру өчен мөмкинлекләр мәйданчыгы да була, ягъни катнашучылар Россия мөселман җәмәгатьчелеге тормышындагы төрле мәсьәләләрне хәл итүгә кагылышлы социаль стартапларны оештырырга өйрәнә: алар идея рәвешендә яки грант алырлык әзер проект булырга да мөмкин.
****
«Россия 24» каналында «922 по Булгару» фильмы премьерасы тәкъдим ителде. Станислав Назаровның документаль фильмы Идел буе Болгар дәүләтендә ислам кабул итүнең 1100 еллыгына багышланган. Фильм кешеләрнең гасырдан гасырга күчереп алып килгән кыйммәтләре турында сөйли.
****
Кечкенә генә гамәлләр өчендә чиксез әҗерләр әзерләнгән. «Кардәшеңә елмаю да – сәдака булып санала». Ә сәдака нәрсә соң ул? Ул — савап. Савап кылып яшәргә насыйп булсын дип бүгенгә сезнең белән саубуллашам . Әссәләмегләйкем вә рәхмәтуллаһи вә бәрәкәтүһү.
