Казанның Ягодный һәм Бишбалта бистәләрен тоаштырган иске күперне яңартып корырга җыеналар. Киров районында бер гасыр чамасы элек тимер-бетоннан салынган корылма җимерек хәлдә. Күпер узган гасыр башында күәтле саналган, биредән атлар белән йөк ташыганнар, хәтта трамвайлар да йөргән, ә сугыш вакытында танклар үткән.
Ике бистәне тоташтырган бер гасырлык күперне сүтәргә җыеналар. Конструкциясе яраксызга әйләнгән. Шуннан соң бу урында кабат яңартылган күпер салынырга тиеш.
Күпер җитешсезлекләр белән төзелгән. Дөрес проектланмаган булу сәбәпле, корылма бик тиз җимерелә. Әле 60нчы елларда ук күпердән йөрүдән туктаганнар, ә 2009 елда җәяу узуны да тыйганнар. Корылма Казан картасындагы туристик урыннарның берсе.
Тиз арада сүтмәсәләр, күпер җимерелергә мөмкин. Конструкция уртасыннан ишелгән.
Хәзер күперне сүтү проектын эшләүгә тендер игълан иттеләр. Аннан соң күперне сүтәргә тиешле оешма ачыклана. Шуннан соң гына аны янәдән торгызу буенча рәсми план әзерлиләр.
Фирүзә Насыйрова, Дамир Мөхәммәтханов,Татарстан яңалыклары.
