Әссәлаамү галәйкүм үә рахмәтуллааһи үә бәракәәтуһ!
Бүген Гарәфә көн. Ул җомга көнгә туры килде, димәк хаҗ кылучылар хаҗиәкбәр исеменә лаек була. 810 татарстанлы Мәккәдә кече хаҗ – гомрә гамәлләрен төгәлләп, хаҗ кылу өчен теоретик әзерлекне башлады. Дәресләрдә хәнәфи фикъһе, хәдис гыйлеме, сира һәм башка фәннәр буенча сораулар карала.
Зөлхиҗҗә аеның 7 нче көнендә Татарстан мөфтие Камил хәзрәт Сәмигуллин Казан шәһәре Җәмигъ мәчете һәм аның янәшәсендәге территориянең эскиз проектын эшләүгә ачык халыкара конкурсның жюри утырышында катнашты. Киңәшмә эшенә ул читтән торып Мәккәдән кушылды, Камил хәзрәт хәзерге вакытта изге җирләрдә хаҗ сәфәрендә. Утырышның беренче өлеше Татарстан Республикасы Министрлар Кабинеты Аппараты җитәкчесе Шамил Гафаров рәислегендә экспертлар, министрлыклар һәм ведомстволар җитәкчеләре һәм конкурсантлар катнашында узды. Эскиз проектлары презентациясе аша бүген конкурс җиңүчесе Казан Ратушасында уздырыла торган тантанада билгеле була.
*****
Иртәгә мөселманнар өчен зур бәйрәмнәрнең берсе – Корбан бәйрәме. Мөселманнар Аллаһы Тәгаләнең изге әмерен – тугрылыкны, Аллаһы Тәгаләнең рәхмәтен, буйсынучанлыкны гәүдәләндерүче корбан чалу йоласын башкара.
Бәйрәм чаралары 2:30 сәгатьтә Коръән уку белән башлана. Мәчетләргә бәйрәм көнендә автобусларда бару оештырыла. Корбан чалу өч көн дәвамында – 9, 10 һәм 11 июльдә була. Моны махсус билгеләнгән 17 урында башкарыла.
****
Берсекөнгә,ягъни 10 нчы июльдә Казанның Максим Горький исемендәге Үзәк мәдәният һәм ял паркында Корбан гаете уңаеннан, традиция буенча, «Корбан Фест» зур гаилә фестивале уздырыла. Бәйрәм Казан шәһәренең Татарстан мөселманнары Диния нәзарәтенең Вахитов һәм Идел буе районнары мөхтәсибәте тарафыннан Казан халкы һәм кунаклар өчен бишенче тапкыр уздырыла. Чараның төп темасы Идел буе Болгар дәүләтендә ислам динен кабул итүгә 1100 ел тулуга багышланган. «Корбан Фест» фестиваленең максаты гаилә кыйммәтләрен, рухи һәм дини традицияләрне саклауга юнәлдерелгән.
****
Оста барда телеңне тый дигән элгәрәребез. Әйдәгез бергәләп вәгазьләнеп алыйк. Вәгазь сөйләү өчен сүзне Рөстәм хәзрәт Зиннуровка бирәм.
****
Ислам дине — ул мәрхәмәтлелек дине. Шуңа күрә мөселманнарга мәрхәмәтле, әхлаклы, әдәпле булу мөһим.
Кеше өчен иң кирәге – әдәп, диген.Әдәп – көчле мәхәббәткә сәбәп, диген, Әдәпсездә бәхет тә юк, тәүфыйк та юк Кеше исемен күтәрү дә гаҗәп, дип язган шагыйрь Акмулла. Барыгызга да әдәпле –әхлаклы холык теләп сабулашам. Киләсе корбан бәйрәмебез мөбарәк,чалыначак корбаннарыгыз кабул булсын. Әссәлаамү галәйкүм үә рахмәтуллааһи үә бәракәәтуһ!
