Танылган кошлар белгече Ринур Бикмансуров Әлмәт районына ак бөркетләрне күзәтергә килде. Яңа туган кошларны исәпкә алу өчен, махсус беләзекләр кидерде. Кошларның әти-әниләре — Алтын белән Алтынай кушаматлы бөркетләр моны читтән карап торды, ә кызыксынучылар он-лайн трансляцияне карады.
Бу кадрларда бөтен дөньяга танылган кечкенә бөркет балалары. Хәзер бу кошларны, ата-аналар оясыннан очып киткәннән соң да, теләсә кайсы җирдә танырга мөмкин. Исемле номерлары махсус беләзекләргә язылган. Кошлар тиктормас булсалар да, аларга орнитолог беләзекне тиз кидерде. Кошларның әти- әнисе дә комачауламады. Алтын һәм Алтынай процессны сабырлык белән күзәтте.
Дөньяның төрле почмакларында яшәүчеләр туры эфирда кошлар язмышы өчен борчылып, фикер алышты.
Алтын һәм Алтынай өчен болар беренче балалары түгел. Берничә ел инде алар кыш узгач, «Түбән Кама» паркына очып килә. Быел йомыркадан өч бала чыккан, тик берсе исән калмаган. Орнитолог кошларның җенесен билгеләде. Хәзер ике малайга да исемнәр сайларга калды.
Ак бөркетләр гаиләсен онлайн режимда “Орлан-Белохвост» каналында күзәтергә мөмкин
Валентина Васильева, Татарстан яңалыклары.
