Кабан күле яр буенда чечетка биюе нигезләренә багышланган мастер-класс узды. Әлеге чара – Казан Мэриясе оештырган быелгы «Хәрәкәттә – бәрәкәт» проектының икенче дәресе. Тулырак Динә Нәҗметдинова сюжетында.
Чечетканы икенче төрле степ дип тә атыйлар. Инглизчәдән тәрҗемә иткәндә, «step» сүзе «адым» дигәнне аңлата. Әлеге бию жанрына Билл Робинсон, Сэмми Дэвис, абыйлы-энеле Николаслар нигез салган. 25 нче майда – Билл Робинсонның туган көнендә – чечетка көне билгеләп үтелә.
Бию хәрәкәтләренә Татарстанның халык артисты Илдус Габдрахманов, актерлар Артур Шәйдуллин һәм Ләйcән Гатауллина төшендерде. Искәртеп узыйк, чечетканы «аяк музыкасы» дип тә әйтергә мөмкин. Чечетка тере, динамикалы булуы белән аерылып тора. Әлеге биюнең төп үзенчәлеге – каты өслектә ритмлы хәрәкәтләр ясап биюдә. Гадәттә, аны металл пластиналар белән эшләнгән махсус аяк киеме киеп бииләр.
Чаралар Казан Мэриясе тарафыннан Парклар һәм скверлар дирекциясе белән берлектә сентябрьгә кадәр уздырылачак.
Динә Нәҗметдинова, Илдар Галяутдинов.
