Әссәләмегләйкем вә рәхмәтуллаһи вә бәрәкәтүһү.
Шушы көннәрдә Казансу буенда төзелергә тиешле Җәмигъ мәчетенең эскиз проектын эшләү буенча семинар узды.
Zoom форматында узган фикер алышуда проект әзерләүчеләр конкурсны оештыру комитеты белгечләреннән киңәшләр алды. Конкурс “Игелек – Доброта” җәмгыятьнең рухи-әхлакый үсешенә ярдәм итү республика фонды тарафыннан игълан ителгән иде.
***
Казан экспертлары Татарстанда мәчетләр төзү һәм аларны бизәү традицияләренә кагылышлы төрле темалар буенча чыгышлар ясады. Татарстан мөфтие Камил хәзрәт Сәмигуллин революциягә кадәр һәм бүгенге заманда төзелгән татар мәчетләренең көнкүреш шартлары белән таныштырды. Татар мәчетләрен бизәүдә архитектур-декоратив үзенчәлекләр турында сәнгать фәннәре докторы, Гүзәл Вәлиева-Сөләйманова, мөселман эпиграфикасы турында –Үзбәкстан галиме Бахтиер Бабаджанов сөйләде.
Казан Җәмигъ мәчете эскиз проектын эшләүгә халыкара конкурста җиңүче июль аенда корбан бәйрәмендә игълан ителә.
***
Ә бөтен дөнья мөселманнарының изге Корбан бәйрәме Татарстан мөфтиятенең Казыйлар һәм Голамәләр шуралары тарафыннан
8 нче июльдә була дип расланды .
****
Июнь ае шаулап-гөрләп үткән Сабан -бәйрәме истәлекләре белән күңелләргә кереп кала. Ә бәйрәмнең иң көтеп алган ярышы көрәш. Атаклы галимебез Шиһабетдин Мәрҗани хәзрәтләре дә оста көрәшче булган. Тирә-якта аны җиңүче табылмаган дип искәртә тормыш юлын өйрәнүче галимнәр. Мәрҗани кебек оста көрәшчеләр Буа мәдрәсәсендә дә укый. Ислам Сәетморатов – быел ике тапкыр Сабан туе батыры исемен яулады. Башта Яңа Тинчәле авылында , аннан Буа Сабантуенда яшьләр арасында батыр калды.
Милли китапханәдә беренче мәртәбә «Почта маркаларында Ислам тарихы чагылышы» күргәзмәсе ачылды. Туплаучысы Альберт Кадыйров. Ул Идел буе Болгар дәүләтендә Ислам дине кабул ителүнең 1100 еллыгына багышланган маркаларны да тәкъдим итте.
Экспозициядә 1950-2014 елларда төрле мөселман илләре почталары тарафыннан чыгарылган маркаларны күрергә мөмкин. Күргәзмә уңаеннан белгечләр,марка тарихы белән кызыксынучылар катнашында фикер алышу да узды.
Адәм баласы өчен иң зур байлык- сәламәтлек. Исламча сәламәтлек – ул рух тынычлыгы һәм тормышта бар яктан иминлек дигән сүз.Барыгызга да рух тынчлыгы һәм иминлек теләп бүгенгә саубуллашам. Әссәләмегләйкем вә рәхмәтуллаһи вә бәрәкәтүһү.
