Татарстан башкаласы быел 3 миллион 500 мең туристны кабул итәргә әзер. Бу хакта туристик индустрия вәкилләренең стратегик сессиясендә әйтелде. Туристлар агымы бу җәйдә пандемиягә кадәрге ел дәрәҗәсенә кайтырга мөмкин. Бу тармак вәкилләре тагын нинди максатлар куя, нинди проблемалар белән очраша? Хәбәрчебез кызыксынды.
Май аенда узган чаралар, җыр – бию бәйгеләре, төрле милләтләр ашамлыклары мәҗлесләре, велосипедта узышулар, башка мавыктыргыч ярышлар җирле халыкны гына түгел, Татарстан башкаласының меңләгән кунакларын да җәлеп итте. Бәйрәмнәрдә Казанга ике йөз меңнән артык кеше килде.Туристлар саны артырга мөмкин.
Туристлар индустриясе вәкилләренең стратегик сессиясендә республикага кунакларны җәлеп итү юлларын эзләделәр. Хәзер тармак беркайчан булмаганча туроператорлар ярдәменә мохтаҗ.
Тагын бер проблема — кадрлар. Туризм өлкәсендә эшләргә теләүчеләр күп түгел. Бергәләп эшләгәндә, елына 5 миллион туристны кабул итү мөмкинлеге бар. Татарстанда күрсәтерлек кызыклы тарихи урыннар бар, туристик сәяхәтләрне, экскурсияләрне нәтиҗәле итеп оештырырга гына кирәк.
Айнур Вәлиәхмәтов, Александр Решеткин, Татарстан яңалыклары.
