Саф сулы чишмәләре, тезелеп киткән таулары, куе урманнары бар. Шуңа да Бәбки авылы районда экологик яктан чиста авыллар исемлегенә керә. Җәйләрен биредә тормыш җанлана, ял итергә кайтучылар күбәя.
Буадан 20 чакрым ераклыкта урнашкан авыл халыкны ни белән җәлеп итә? Киләсе материалда карагыз.
Бәбки авылы элек-электән шифалы, тәмле сулы күпсанлы чишмәләре белән дан тота. Шуларның берсе – халык телендә “урыс кизләве” дип йөртелә, ул 1911нче елларда төзелә. Аны тау башында яшәүче православие динле крестьяннар ясаганнар.
Аннан ерак түгел “Гайни чишмәсе” урнашкан. Анысын узган елларда ремонтлаганнар. Беседкасы тимердән ясалса, улагы чын агачтан булырга тиеш дип карар кылганнар, чөнки элек-электән шулай булган.
Биредә яшәүче халык мунчада да шифалы су белән юына. Һәрбер өйгә ул турыдан-туры кертелгән һәм чыгарылган. Чишмә суы артыннан Буа, күрше-тирә районнардан да киләләр. Табигатьнең гүзәл почмагында урнашкан авылда, чишмәләрдән тыш, тезелеп киткән таулар да, куе урманнар да бар.
Бәбки районда “экологик чиста авыл” исемен йөртә. Шуңадырмы, җәйләрен бирегә ял итергә кайтучылар күп. Авылны туристлар ял итү территориясенә әверелдерсәң, матур табигатьле туган ягыбыз тагын да җанланыр иде дип хыяллана бәбкилеләр.
Алсу Сәмигуллина, Ильнур Кадыйров. Татарстан яңалыклары
