«Изге Болгар җыены» фестивале барлык дин һәм конфессия вәкилләрен берләштерде. Тарихи вакыйга урыныннан безнең репортаж.
20 меңнән артык кеше борынгы Болгар җиренә, бай тарихлы бәйрәмгә агылды.
«Изге Болгар җыены» фестивале Аллаһ Тәгаләгә мөрәҗәгать итү белән башланды. Борынгы Болгар шәһәрендә өйлә намазы.
Дистәләгән күренекле мәдәният эшлеклеләре килгән. Сәхнәдән берәүләр мөнәҗәтләр әйтә, ә икенчеләре тарихны чагылдырган тамаша күрсәтә.
Ә кемдер һәрбер мизгелне фоторәсемгә төшереп калдырырга омтыла, хәтта рәссам вакыйганы шунда ук рәсемгә төшерә.
Болгар цивилизациясе музеенда 13нче гасырда кышкы Болгар сурәтләнгән картиналар күргәзмәсе.
Күпләрне мондый бәйрәм гаҗәпкә калдыра, бигрәк тә чит ил кунакларын.
Кунаклар өчен көн буе музейлар, кафелар, халык сәнгать кәсепчелеге эшләнмәләре, хәләл һәм сувенир продукциясе белән сәүдә мәйданчыклары эшләде. 1100 ел элек булган кебек үк, Ислам – тынычлык һәм игелек тарихында яңа сәхифәне башлау өчен бөтен дөньядан вәкилләр килгән иде. Һәм финал аккорды. Аның өчен оештыручылар махсус тамаша әзерләгән — Ак мәчет йөзләгән төскә күмелеп җемелди.
Булат Шакиев,Ленар Хәбибуллин. Татарстан яңалыклары, Болгар.
