Бу хакта республика биоресурслар комитетынан хәбәр иттеләр. Республикада яшәүчеләрне урманнарда, тугай-болыннарда йөргәндә, сак булырга өндиләр. Агулы еланнарны кайсы районнарда очратырга мөмкин, елан чагу сәламәтлеккә ни дәрәҗәдә куркыныч? Хәбәрчебез ачыклады.
Кара еланнар күренә башлаган инде. Бу видеоязма Ян тау чаңгысы комплексы территориясендә төшерелгән.
Гео Казан
Елннар Казан янындагы урманнарда да очрый. Кара еланнар кышкы йокыдан уянган, әлегә алар бик сүлпән.
Еланнар җылыда активлаша. Салкында алар сүлпән. Юлда барганда каршыгызга кара елан очраса, читләтеп үтегез. Өстенә басмасаң, ул үзе һөҗүм итми, чакмый.
Сулыклар янында кара еланнарны очратып булмый.Елгаларда, күлләрдә еш кына аларны кара төстәге тузбаш еланнар белән бутыйлар. Алар да чагырга мөмкин, ә агулары юк.
Әгәр агулы еланнарны очратсагыз, өстенә басудан сак булыгыз. Мондый очрашу еланнарга да стресс.
Теләсә кайсы еланны читләтеп узу яхшырак. Кызыл китапка керүче еланнар да бар. Аларда стресс булып, йомырка салмаска мөмкиннәр.
Елан чакса, кабаланмагыз. Вакытында чара күрелсә, агу тәнгә таралып, зур зыян китерә алмый.
Елан чагу хроник авырулары булган кешеләргә, балаларга аеруча зарарлы.Кырда яки урманда елан чакса, ашыгыч ярдәм килеп җиткәнче, аллергиягә каршы препарат кабул итәргә, бер литр ярым чамасы су эчәргә кирәк.
Казан тирәләрендә кара еланнар сирәк очрый. Алар,Яшел Үзән, Биектау, Югары Ослан һәм Питрәч районнарында, республиканың көнчыгышында- Чаллыдан һәм Алабугадан ерак түгел, шулай ук Әлки районыны урманнарында күп.
Александр Шмагин. Ирек Хәмидуллин, Татарстан яңалыклары.
