Киләсе атнаның төп вакыйгасы-Идел буе Болгар дәүләтендә ислам динен кабул итүнең 1100 еллыгын бәйрәм итү. Казанда яңа Җәмигъ мәчете нигезенә беренче таш салу, шулай ук традицион «Казан саммиты» көтелә. Парламент хәбәрләре белән тулырак минем коллегам Алия Галиуллина таныштыра.
Киләсе шимбә көнне Спас районында «Изге болгар җыены» уза. Татарстан дөньяның төрле илләреннән килгән кунакларны көтә. Тантанада Татарстан Президенты, шулай ук парламентарийлар катнашыр дип көтелә.
…
Дәүләт Советы рәисе Фәрит Мөхәммәтшин фермерларны дәүләт ярдәме программаларында активрак катнашырга чакырды. Ул Буа районында авыл халкының эшлекле активлыгын арттыру мәсьәләләре буенча киңәшмә үткәрде. Шулай ук «Хәтер бакчасы» акциясендә катнашты, үзәк район хастаханәсендә табиблар белән аралашты.
Өлкән яшьтәгеләр өчен биредә барлык шартлар да тудырылган. Гериатрик кабинетны заманча медицина җиһазлары белән тәэмин иткәннәр, квалификацияле белгечләр кабул итәләр. Һәр пациентның авыпу тарихын мәгълүматлар базасына кертәләр.
Аларның бөтен тормышлары, авырулары, ничек яшәүләре язылган, чөнки өлкән кешеләргә боларның барысы да бик мөһим.
«Хәтер бакчасы» акциясе узды. Фәрит Мөхәммәтшин Бөек Ватан сугышы фронтларыннан әйләнеп кайтмаган якташларның батырлыгы истәлегенә каштан утыртты. Халык һөнәрчелеге күргәзмәсендә катнашты. Катнашучыларның берсе-Светлана Ванямова да үз әйберләрен тәкъдим итте.
Хәзер Татарстан сөт, бәрәңге, терлек, кош ите, йомырка җитештерү буенча илдә алдынгы урында тора,дип билгеләп үттеләр хакимият, эшмәкәрләр һәм депутатлар җыелган утырышта. Авылда эш активлыгын арттыру турында фикер алыштылар. Узган ел республика аграрийлары ике миллион ярым тоннага якын ашлык җыеп алган-бу 2010 елдагыга караганда күбрәк. Моңа яңа технологияләр куллану нәтиҗәсендә ирешелде. Ил икътисадына санкция басымы шартларында яңа чакырулар барлыкка килде.
Азык-төлек куркынычсызлыгын тәэмин итү стратегик, хәлиткеч әһәмияткә ия. Хуҗалык итүнең кече формалары продукциянең яртысыннан артыгын җитештерделәр. Моңа дәүләт ярдәме чараларын камилләштерү нәтиҗәсендә ирешелде. Быел грантның яңа төрләре кертелде, шәхси ярдәмче хуҗалыкларга субсидияләр күләме артты.
Утырышта азык-төлек куркынычсызлыгы турында сөйләштеләр. Татарстан үзен тулысынча продукция белән тәэмин итә. Әмма кайбер районнарда терлекләрнең баш саны кимү очраклары бар. Ел саен фермер хуҗалыкларына ярдәм итү өчен ике миллиард сумнан артык акча бүлеп бирелә. Республика бюджетына ярдәм итү чаралары күләме дә 8% ка арта. Фәрит Мөхәммәтшин фермерларны дәүләт ярдәме программаларыннан активрак файдаланырга өндәде.
Иң яхшы авыл хуҗалыгы предприятиеләре һәм фермерлар бүләкләр алды. Киләсе зона киңәшмәләре Кукмара, Мөслим һәм Чирмешән районнарында уза.
