Әссәләмегаләйкем вә рәхмәтуллаһи вә бәрәкәтүһү хөрмәтле тамашачылар, дин кардәшләр!
Бүген Шәүвәл аеның 5 нче көне. “Шәүвәл аенда алты көн тоткан уразасына кеше дөньяга килгән сабый бала кебек гөнаһсыз булыр”, – диелә бер хәдистә. Бала дөньяга килгәндә беләбез, гөнаһсыз булып туа. Шулай ук кеше дә Рамазан уразасын тотканнан соң, шәүвәл аенда да алты көн ураза тотып уздырса, гөнаһсыз бала кебек калыр, ди. Рамазан ае нәтиҗәләре буенча, Татарстан мөселманнары Диния нәзарәте мөхтәсибәтләре тырышлыгы белән 780 мең кеше катнашында ифтарлар узды. 10 Республика ифтары иң массакүләм мәҗлес булды, ә республика районнары арасында ифтарда катнашучылар саны буенча лидерлар рәтендә Казанның Совет районы мөхтәсибәте. Шулай ук «Ярдам – Помощь» хәйрия фонды 45 000 кешегә авыз ачтырды.
****
Казан шәһәре Залесный бистәсендә яңа иман йорты – XX йөз күренекле мөселман дин эшлеклесе Әхмәтзәки хәзрәт Сафиуллин исемен йөрткән мәчет ачылды. Ул башкалабызның Киров һәм Мәскәү районнары мөхтәсибәтендә 16нчы мәчет. Шулай ук Рамазан ае башланыр алдыннан Питрәч районының Яңа шигали авылында мәчет ачылды дип хәбәр иткән идек. Аллаһының рәмәте белән шул ук районнынң Богородское авылында да яңа мәчет төзелеп килә. Шушы көннәрдә «Сәфәр» мәчете манарасына тантаналы рәвештә ай куелды. Тантаналы вакыйганың кайбер мизгелләрен сезнең игътибарга да тәкъдим итәбез.
Сюжет
Ел саен, май аеннан башлап (Казан өчен 5 нче майдан 6 нчы майга каршы төндә) һәм август башына кадәр, безнең төбәкнең географик үзенчәлекләренә бәйле рәвештә, иртәнге намаз вакыты үзгәрә.Иртәгә Казанда иртәнге намаз ике туларга 13 минутта. Төгәл вакытларын Диния назәрәте сайтында һәм махсус календарьләр аша белә аласыз.
*************
Бүгенгә дини вәзгыятҗкә кагылышлы яңалыкларыбыз шушылар иде. Барыгызга да саулык-сәламәтлек теләп саубуллашам. Әссәләмүгаләйкүм, вә рәхмәтуллаһи, вә бәрәкәтүһү.
