Казан Кремлендә республиканың зур казанышларга ирешкән иллегә якын кешесенә дәүләт бүләкләре тапшырылды. Тантана Яз һәм хезмәт бәйрәменә багышланды. Бүләкләрне Бөек Ватан сугышы ветераннары да алды.
Казан Кремлендә хөрмәт казанган һәм дәүләт исеменнән рәхмәткә лаек кешеләрне кабул иттеләр. Бүләкләр аерым кешеләргә бирелсә дә, һәрберсе өчен-зур коллективлар эшенә бәя.
Тантананы ветераннарны хөрмәтләүдән башладылар. «День Победы» җыры яңгырганда, зал өлкәннәрне аягүрә басып алкышлады. Сугыш кырларында батырлык күрсәткән һәм тылда фидакарь эшләгән ветераннарга ТАССРның йөзьеллыгы медален тапшырдылар. Николай Аникин сугыш елларында легендар ПЕ -2 самолетын җыйган, Королевның үзенә булышкан.
Бүләкләнүчеләр арасында Сарман аграр көллияте директоры да бар иде. Соңгы 20 ел эчендә ул гадәти район техникумын Идел буенда алдынгы ресурс үзәгенә әйләндергән.
Табибларга аерым игътибар бирелде. Алар һаман да коронавирус йогышына каршы көрәшәр. Казанның җиденче хастаханәсе җитәкчесе хезмәтен бәяләделәр -Татарстанның «атказанган табибы» исемен бирделәр.
Иллегә якын кеше дәүләт бүләгенә лаек булды – барысы да эшкә бирелгән, күпьеллык хезмәте һәм республика үсешенә бәяләп бетергесез өлеш керткән. Тантанадан яңа хезмәт үрләрен яулау, яңа ачышлар ясау омтылышы белән таралыштылар.
Алмаз Хәкимов, Ринат Сәхибгәрәев, Татарстан яңалыклары.
