Ярдәм алуга ук, эшкә дә керешкәннәр. Казан аграр университетында Татарстанда «Фермер мәктәбе» белем бирү проектын тәмамлаучыларга грантлар алу өчен сертификатлар тапшырылды. Яшь эшмәкәрләр үз бизнес-проектларын кайсы юнәлешләрдә гамәлгә ашыра? Бу хакта киләсе репортажда.
Ике ай дәвамында фермер мәктәбендә 40 кеше дүрт юнәлеш — «Терлекчелек», «Кошчылык», «Атчылык», «Үсемлекчелек» буенча белем алды. Грант алучыларның берсе — Әгерҗе районыннан Рөстәм Гобәйдуллин. Профессиональ педагог тагын бер һөнәрне үзләштерергә булган.
Сөт җитештерү өлкәсендә бизнес-проект әзерләгән. Сыйфатлы сөт җитми, шуңа күрә 50 баш савым сыерга исәпләнгән ферма бик кирәк, ди.Терлекләр санын арттырырга да мөмкин.
Оксана Посадская грант ярдәмендә Чүпрәле районында чикләвек үстерә башлаган, ә Нурлаттан Шамил Амагомедов ат үрчетү белән шөгыльләнергә уйлый. Аграр университет белгечләре һәм галимнәре үз шәкертләре белән киләчәктә дә элемтәдә торырга, практик киңәшләре белән булышырга җыеналар.
Авыл хуҗалыгына профессиональ кадрлар әзерләү өчен тармак министрлыгы, профильле югары уку йорты, бизнес һәм фермерларның мөмкинлекләрен берләштерергә кирәк. Россельхозбанкның Татарстандагы филиалы җитәкчесе хәзерге шартларда проектны уникаль дип атады.
«Фермер мәктәбе»ндә катнашучылар үзләренең финанс белемнәрен арттырдылар, бизнес алып баруның юридик нечкәлекләрен белделәр,хәтта цифрлы инструментлардан да файдаланырга өйрәнделәр. Бу өлкәдә эшләргә теләүчеләр аз түгел, шуңа күрә республикада әлеге проект дәвам итә.
Дмитрий Второв, Дамир Мөхәммәтханов,Татарстан яңалыклары.
