Буа районы ветераннар Советы каршында кул эшләре күргәзмәсе оештырылды. Биредә дистәләгән өлкән яшьтәге авторларның иҗаты белән танышырга мөмкин. Иң яхшы эшләр республика күргәзмәсендә катнашу өчен сайлап алына.
Бәйләгән оекбаш, кофта, милли киемнән “киенгән” курчаклар, тасмалардан ясалган картиналар һәм биналарның агач макетлары. Бу матурлыктан күзләр камаша. Һәр иҗат җимеше — сәнгать әсәре. “Оста кул” клубы җитәкчесе Нина Дунаева тасмалардан картина ясаган.
Ветераннар Советы Рәисенең эш кабинетында ветераннарның 80нән артык кул эше урнаштырылган. Махсус жюри аларның иң яхшыларын билгеләде. Алар “Ветераннар иҗаты” республика күргәзмәсендә катнашачак.
Димәк, буалылар күргәзмәне үз күзләре белән күрә ала. Район Ветераннар Советы бигрәк тә укучыларны көтә.
Алсу Сәмигуллина, Ильнур Кадыйров. Татарстан яңалыклары