Иран Ислам Республикасының Казандагы Вице-консулы Масүд Моллаи шушы фикерне белдерде.
Ул «Татарстан» дәүләт телерадиокомпаниясе һәм Халыклар дуслыгы йортының уртак проекты — «Национальный вопрос и ответ – Миллият:сорау һәм җавап» программасының кунагы булды. Көнбатыш санкцияләренең аерым дәүләтләргә карата ничек йогынты ясавы турында аңлатма бирде.
Минем туган илемә карата санкцияләр күптән кертелгән иде. Иранда Ислам революциясенең җиңүеннән бирле, Көнбатыш һәм АКШның теге яки бу санкцияләре тәэсирендә яшәдек. Без санкцияләр нәтиҗәсез дигән фикергә килдек. Иран 43 ел санкцияләр белән яши, шулай да илнең үсеше барлык өлкәләрдә дә дәвам итә. Фән өлкәсендә Иран галимнәре дөньяда алдынгы позициядә — мин хәзер атом төш энергетикасы, нанотехнологияләр, башка яңа технологияләр турында сөйлим. Ил лидерлары санкцияләр безнең үсешне беркайчан да туктата алмый, диләр. Әлбәттә, санкцияләр басымы сизелә. Үз көчеңә, үз мөмкинлекләреңә таянырга кирәк. Шуңа күрә санкцияләрне үз бәйсезлегебезне саклаган өчен «түләү» дип кабул итәбез. Бездә санкциягә каршы торуның зур тәҗрибәсе бар, без аны бик уңышлы дип саныйбыз һәм үсеш дәвам итәр дип ышанабыз.
