Идел ярының ишелүен туктату –көнүзәк мөһим бурычларның берсе. Кама Тамагы районында елга ярын ныгыту буенча зур күләмле эшләргә әзерләнәләр. Елга яры ничек үзгәрәчәк? Хәбәрчебез белеште.
Әлегә Идел елгасы яр буен кар каплаган. Язгы ташу башлану белән ярның ишелү куркынычы арта.
Яр буеның ишелүе үз йортлары белән торучыларны борчый. Йортлары су астында калырга мөмкин, шуңа күрә кайберәүләр йорт-кураларын тизрәк сатарга тырыша.
Узган ел елга яры ишелеп, кеше җәсәдләре дә табылган. Бу урында борынгы зират булган. Зират ишелмәсен, туристлар юлын туктатмас өчен, быел яр буйларын 9 метрлы терәкләр белән ныгыталар. Әлеге эш «Табигый ресурсларны яңадан торгызу һәм куллану» федераль программасы буенча алып барыла.
Әлеге объектның озынлыгы-580 метр, монда биек ярларны күрәбез. Ишелүне туктату өчен, кичекмәстән ярны терәкләр белән ныгытырга кирәк. Бу урында Иделнең агымы да көчле.
Бу Кама Тамагында Идел ярын ныгытуның икенче этабы. Пристань янында биек терәкләр куелган инде.
Киләчәктә инфраструктура булдыру планы бар. Янәшдә юллар төзелә, яктырткыч җайланмалар әзер инде.
Идел ярын ныгыту эшләре апрель аенда башлана. Әлегә кар, бозның эреп агуын көтәләр,. Шунысы ачык -янәшәдә яшәүчеләргә уңайсызлыклар бетәргә тиеш.
Айнур Вәлиәхмәтов, Дамир Мөхәммәтханов, Татарстан яңалыклары.
