Халыкара Туган телләр көнендә Татарстан Республикасы Президенты каршындагы Татар телен саклау һәм үстерү мәсьәләләре комиссиясе игълан иткән әдәби бәйге җиңүчеләренә бүләкләр тапшырылды. Бүләкләү тантанасы Язучылар Союзында узды. Җиңүчеләрне котлау тантанасы әдәби-музыкаль кичә итеп оештырылды. Тулырак хәбәрчеләребез язмасында.
Республикабызда татар телендә төрле әдәби конкурслар оештырыла. Әлегә мондый масштаблы, күп жанрларны үз эченә алган әдәби бәйге юк иде. Татар телен саклау һәм үстерү, татар әдәбиятын яңа әсәрләр белән баету, татар язучыларын иҗат итүгә кызыксындыру, татар телендә әдәби әсәрләр иҗат итүче яңа авторларны барлау максатыннан тормышка ашырылган проект ун номинациядә үтте. Болар: «Роман», «Повесть», «Хикәя», «Поэма», «Шигырь». Конкурска 1500гә якын эш килгән.
Әдәби конкурста җиңүчеләрне әсәрләрен иң беренче укып бәя бирүчеләр дә котлады.
Ябык әдәби конкурста роман жанры күләмле булу сәбәпле җиңүчеләр исемлеге күптән түгел генә игълан ителде. Нәтиҗәләр көткән өметләрне аклады. 3 нче урынга лаек булган драматург Равил Сабир прозаик буларак танылды. Фирдүс Гыймалтдинов тарихи роман иҗат итеп әзер язучы булуын, Зөлфәт Хәким татар әдәбиятында үз стилен тапкан роман остасы икәнлеген раслады .
Бәйге җиңүчеләренә дипломнарны һәм сертификатларны Марат Әхмәтов белән жюри рәисе Ркаил Зәйдулла тапшырды.
Бәйгегә килгән әсәрләр киләчәктә китап итеп басырып чыгарыла. Шулай ук электрон гаммәви чаралар, көндәлек матбугат аша да , укучыларга тәкъдим ителә.
Ләлә Зәйнуллина, Ирек Хәмидуллин. Татарстан яңалыклары.
