Республикада 12 яшьтән алып 17 яшькә кадәр яшүсмерләргә ковидтан прививка ясау дәвам итә. Чаллыдагы байтак поликлиникалар әлеге чарага кушылды. Шәһәргә вакцинаның беренче дозалары гыйнвар ахырында ук кайтарылган иде. Яшүсмерләргә Спутник М дигән аз дозалы вакцина ясала.
16 яшьлек Сергей Садовников үз теләге белән ковидтан прививка ясатырга булган. Шәһәргә Спутник М вакцинасы кайтарылгач, беренчеләрдән булып поликлиникага килгән.
3нче балалар поликлиникасына прививка ясатырга берьюлы егермеләп үсмер килгән. Прививка бары тик ата-аналар ризалыгы белән генә ясала, алар балаларын озатып йөри.
Процедура алдыннан табиб яшүсмерләрнең үпкә, йөрәген тикшерә, тән температурасын, кан басымын үлчиләр. Бу вакцина ясарга ярыймы-юкмы икәнлеген ачыкларга мөмкинлек бирә.
Белгечләр сүзләренә караганда, вакцина үзен нәтиҗәле күрсәткән. Өлкәннәр вакцинасынннан концентрациянең ике тапкырга кимрәк булуы белән аерыла. «Спутник М» шулай ук 21 көн аермасы белән ике тапкыр ясала. 12 яшькә кадәрге балаларга, хроник, кискен вируслы авыруларга яки аллергик реакция булучыларга прививка ясау тыела.
15 яшен тутырган яшүсмерләр өстәмә рәвештә үз ризалыкларын да бирәләр. Табиблар билгеләп үткәнчә, тулаем алганда, яшь пациентлар вакцинаны җиңел кичерә, бераз тән температуралары күтәрелергә, хәлсезлек булырга мөмкин.
Эльмира Гайнетдинова, Татарстан яңалыклары, Чаллы.
