Гольф уены чемпионнарын Татарстанда әзерли башлыйлар. Быел Казан янында гольф академиясе барлыкка килә. Яңа үзәк корыла торган мәйданда пресс-турны спорт министры үзе үткәрде. Бу уенга кайда өйрәнергә һәм үзәк кайчан ачылырга мөмкин? Бу хакта киләсе репортажда.
Идел елгасы яры буенда 82 гектарда гольф уеннары өчен кирәкле төрле табигый ландшафтлар сайлап алынган.
Болар барысы да — балалар-яшүсмерләр гольф академиясе урнашачак яңа спорт комплексы территориясе.
Биредә ел әйләнәсенә шөгыльләнү мөмкин була.500 квадрат метр мәйданда төп бина төзелгән. Хәзер биредә буяу- бизәү эшләре бара, плитәләр китерелгән. План буенча монда тренажер залы, теория, киенү-чишенү бүлмәләре, кибет һәм кафе була.
Гольф уены өчен илдә шартлар юк диярлек, ә монда барысы да булачак. Җәй көне уен мәйданчыклары эшли башлар дип көтелә. Барлык спорт уен кораллары белән җиһазландырыла, остаханә дә булырга тиеш. Техника яңа салына торган гаражда саклаынрга тиеш, уен мәйданчыгын төрле 40 трактор һәм җайланма карап торыр дип планлаштырыла.
Әлеге спорт комплексы шәхси инвестор акчасына төзелә Бу җәйдә һәркем гольф уйный ала. Аның бәясе күпме булыр — әлегә билгеле түгел, тик министрлыкта әлеге спорт төрен халыкка популяр итү өчен барысын да эшләргә тырышалар.
Булат Шакиев, Илдар Галәветдинов, Татарстан яңалыклары.
