Билгеләнгән планнарны тормышка ашыру өчен еш кына финанс мөмкинлекләре җитми. Нәкъ менә төрле кызыклы проектларга ярдәм итү өчен грантлар системасы эшли – алар ярдәмендә иң кыю идеяләр һәм теләкләр чынга ашырыла. Чираттагы грантлар Республикабызның мәктәп һәм балалар бакчаларына юнәлдерелде. Тулырак Фәннур Хәсәнов видеоязмасында.
Үткән 2021 ел-Туган телләр һәм халыклар бердәмлеге елы кысаларында Татарстан Республикасы территориясендә яшәүче халыкларның телләрен, гореф-гадәтләрен , мәдәниятләрен саклауга һәм үстерүгә юнәлдерелгән проектларны гамәгә ашыруда муниципаль мәктәпкәчә белем бирү оешмаларына һәм муниципаль гомуми белем бирү оешмаларына ярдәм итү грантын отучы балалар бакчалары һәм мәктәпләре билгеләнде. Шул уңайдан Татарстан телерадиокомпаниясенең иҗат төркеме Чистай районындагы җиңүче мәктәп һәм балалар бакчасында булып, аралашып кайтты.
2021 елга Туган телләр һәм Халык бердәмлеге елы кысаларында Чистай муниципаль районының 7 белем бирү учреждениесе «Татарстан Республикасы халыклары телләрен һәм мәдәниятләрен саклап калуга һәм үстерүгә юнәлтелгән проектларны тормышка ашыруда муниципаль мәгариф оешмаларына һәм мәктәпкәчә белем бирү учреждениеләренә ярдәм итү» проектлар бәйгесендә катнашып Грантлар отты.
Безнең балалар бакчасында “Бизәкләп туку” буенча балалар иҗат үзәге эшләп килә.Өйрәнү дүрт өлештән тора.Беренче өлештә без балаларны бизәкләп тукуның тарихы белән таныштырабыз. Икенче өлештә җепләр белән эш итәбез. Гади генә бизәкләр ясыйбыз, әкренләп кенә катлауландыра барабыз. Ясалган бизәкләрне кирәк вакытта төрле бәйрәмнәрдә кулланабаз. Шулай барлык өйрәнү юлын үтәбез.
Без зурлар төркеме балалары белән мултьфильм ясарга өйрәнәбез. Иң беренче чиратта техник мөмкинлекләрне барлыйбыз. Бүгенге очракта без пластилин кулланып анимация ясарга өйрәнәбез. Чөнки пластилин белән эш йөртү җиңел.
“Мозаика” проектын тормышка ашыру өчен без алдынгы алымнарны кулландык һәм шуңа да грант оттык. Шул акчага без милли костюмнар, бик күп китаплар, ноутбоклар, видеокамера, төсле принтер, тавыш көчәйтү аппараты, мульт cтудиясе булдырдык. Болар барысы да уку-укыту, тәрбия эшләрендә зур ярдәм булачак.
Әйтеп үтәргә кирәк, бүгенге көндә Чистай районында 77 белем бирү оешмасы эшли: мәктәпкәчә белем бирү программаларын гамәлгә ашыручы 46 белем бирү оешмасы, шул исәптән бер башлангыч мәктәп-балалар бакчасы, 30 -Гомуми белем бирү мәктәбе (шул исәптән икесе — мөмкинлекләре чикләнгән балалар өчен) һәм Балалар һәм яшьләр иҗаты үзәге. Укучыларның милли составы: руслар, татарлар, чуашлар һәм беркүпме башка милләт вәкилләре һәм алар рус, татар, чуаш телләрен өйрәнә.
Үткән 2021 енче елда районның мәктәпкәчә һәм гомуми белем бирү учреждениеләрендә 2960 чара үткәрелгән: «Халыклар дуслыгы» фестивале, «Милли ядкарьләр», «Тукай безнең йөрәкләрдә» конкурсы, «Тел – күңел көзгесе» иншалар конкурсы, шигырь укучылар конкурсы- шушы исемлектән кайберләре генә. Татарстан Республикасы Чистай муниципаль районында дәүләт телләрен һәм башка телләрне саклау, өйрәнү һәм үстерү муниципаль программасы да эшләп килә. Ул Россиядә күпмилләтле халыкларның туган телләрендә белем бирүне һәм үстерүне тәэмин итүгә юнәлдерелгән.
