Спорт учреждениесендә кичекмәстән янгын куркынычсызлыгы проблемаларын хәл итәргә кирәк. Хәзер хоккейчалр күнегүләрне кайда үткәрә? Хәбәрчебез ачыклады.
Боз сараенда булачак үзгәрешләр турында атна башында билгеле булды, шәһәр мэры спорт комплексын төзекләндерергә кушты. Бу максатларга шәһәр бюджетыннан 72 миллион сум акча бүлеп бирелгән. Элегрәк бинада янгын сүндерү һәм төтен җиһазлары системалары белән бәйле проблема турында хәбәр ителгән иде.
Боз сараенда профессиональ спортчылар гына түгел, яшь хоккейчылар һәм фигуралы шуучылар да шөгыльләнә. Боз сараенда тәрбияләнүчеләргә якын арада спорт комплексының ябылуы турында хәбәр иткәннәр.
«Чаллы» хоккей клубыннан хәбәр итүләренчә, команданың тренировкалары урыны турында карар әлегә кабул ителмәгән. Ярышларга килгәндә исә, аларга әле вакыт бар, шул ук вакытта клуб тарафыннан запас вариантлар да карала. Әйтик, Түбән Камадагы боз аренасы. Ә яшь спортчылар шәһәрнең башка мәктәпләрендә шөгыльләнер, тренировкалар «Камаз» боз сараенда һәм ЗЯБ поселогындагы спорткомплекста узар дип көтелә.
Л.Зәйнуллина. Татарстан яңалыклары, Чаллы.
