Бу көннәрдә башкалабызда галим, тарихчы, дин белгече Шиһабетдин Мәрҗани декадасы уза. Казанның «Әл-Мәрҗани» мәчетендә «Татар эшкуарлыгы традицияләре» темасына түгәрәк өстәл узды. Тулырак Ләлә Зәйнуллина язмасында.
“Әл-Мәрҗани” мәчете Екатерина II рөхсәте белән, Татар бистәсендә яшәүче бай сәүдәгәрләр һәм эшмәкәрләр соравы буенча төзелгән. Шул чордан башлап Шиһабетдин хәзрәт мәктәбен узып, күп кенә дин әһелләре һәм сәүдәгәрләр үз тормышларын җәмгыятькә һәм халыкка хезмәт итүгә багышлый. Мәрҗани укучылары беренчеләрдән булып предприятиеләр, мәктәп-мәдрәсәләр ача, газета чыгара.
Айрат Гыймадетдиновның бу мәчеткә бабасы йөргән. Шуңа бу иман йорты аның йөрәгенә аеруча якын.
Бүгенге чарада катнашкан эшмәкәрләр мөселман өммәте тормышына зур өлеш керткән. Кемдер авыру-сырхауларга булышкан, мәчет- мәдрәсә төзегән. Тик бу хакта алар сөйләргә яратмый.
Изге гамәлләр кылу, хәйриячелек элек-электән халкыбызның канына, күңеленә сеңгән. Шушы изге гамәл тутыкмыйча, киләчәк буыннарда да дәвам итсен иде.
Ләлә Зәйнуллина, Ирек Хәмидуллин. Татарстан яңалыклары.
