Габдулла Тукай әдәби музеенда кызыклы чара – музей дәресе узды.
Фатиха Аитова исемендәге 12нче гимназия укучылары Тукайның замандашы, фикердәше һәм якын дусты Хөсәен Ямашев турында бик күп мәгълүмат алды. Музей дәресен хәбәрчебез Айзилә Батырханова да тыңлап кайтты.
Бу дәрес аларның хәтерендә еллар узгач та матур бер истәлек булып сакланыр. Һәр көн күнегелгән дәрес форматыннан бүген алар музейга, тарихта үз эзен калдырган шәхес белән танышырга килде. Дәрес Габдулла Тукайның замандашы, дусты Хөсәен Ямашевның тууына 140 ел тулуга багышлана.
Хөсәен Ямашев – революцион хәрәкәт эшлеклесе, публицист, татарча сәяси эчтәлекле өндәмәләр авторы, Алафузов заводындагы социал-демократик түгәрәкләр оештыручысы. Казанда 1905-1907 еллардагы инкыйлаб вакыйгаларында катнаша. Тукай Хөсәен Ямашев эшчәнлеге белән Уральскида яшәгән вакытта ук танышкан һәм аның белән дуслашкан.
Татарстан милли музее фондларында Хөсәен Ямашев һәм аның гаиләсе коллекциясендәге әйберләр арасында язу җайланмасы, пресс-папье, фарфор савыт- саба бар. Хөсәен Ямашев фотода туганнары, көрәштәшләре, эшчеләр, әдәби түгәрәк әгъзалары арасында сурәтләнгән.
Дәрес азагында укучылар алган белемнәрне ныгытып, тест рәвешендә Хөсәен Ямашев шәхесенә багышланган сорауларга җавап бирде.
Хөсәен Ямашев 1912 елның мартында 30 яшьтә кинәт үлеп китә. Яңа татар бистәсе зиратында җирләнә. Дустының тиз арада үлеме Тукайны тетрәндерә. Хөсәеннең якты истәлеге шигырендә ул Ямашевны үз халкына тугрылыклы шәхес образында күрсәтә.
Айзилә Батырханова, Ирек Хәмидуллин, Татарстан яңалыклары.
