Әлфия Авзалова үзәгендә җырчыны искә алуга багышланган истәлек концерты узды. Кич утыруның бер төре буларак оештырылган музыкаль чарадан хәбәрчебез Мөршидә Җиһан репортажы
Әлеге сәхнә 3 меңнән артык кеше сыйдырышлы Экспо да, филармония залларында да урнашмаган. Бу Әлфия апаның үзе кебек кечкенә генә музей –үзәге. Кечкенә булса да төш кенә. Һәр почмагы Әлфия апа төсен саклый. Мәшһүр җырчы иҗатын үт иткән һәркемгә юл ачык.
Әйе, монда рәсмилек юк. Теләгән кеше чәй белән дә сыйланды, җыр та тыңлады.
Әнисенең туган көнендә җыр бәйрәме оештыруны башлап йөрүче Зөлфия Авзалова үзәк белән элемтәгә яңа технологияләр аша керде. Вакцина ясату сәбәпле Америкадан кайтып өлгермәгән.
Тамашачыга да Әлфия апаны искә алу кичәсе яңа форматта онлайн күрсәтелде.
Концерт барышында Әлфия апа белән бәйле хәтирәләр дә яңарды. Истәлекләрне легендар җырчы белән 35 ел бер сәхнәдә эшләгән Фердинанд Сәлахов уртаклашты.
Галәмдә чыннан да йолдыздлар күп, Әлфия Авзалова исемен йөртергә лаеклылыры да мөгаен бардыр. Бөтендөнья фонотекасын баетырлык мирас калдырган Әлфия Авзалова өчен түгел , ул безнең өчен, әнә шушы үсеп килүче яңа буын балалары өчен мөһим.
Җырчыларның күбесе Әлфия Авзалова исемендәге җыр фестивале лауреатлары.
Әлфия апа ямьле май кичен хәтерләтеп Ак чәчәкләр кебек кар яуган вакытта туган. Аның исән чакта җырлаган соңгы җыры да «Ак чәчәкләр кебек кар ява» була. Күрәсең җырларыннан бөркелгән аклык вә моң аның исемен халык күңелендә мәңгеләштергән.
Мөршидә Җиһан. Ирек Хәмидуллин.Татарстан яңалыклары.
