Иске Чүпрәле авылы елдан-ел төзекләнә, матурая. Яңа ел алдыннан биредә «Дуслык» дип аталган ял паркы ачылды. Бу «Торак һәм шәһәр мохиты» илкүләм һәм «Уңайлы шәһәр мохитын формалаштыру» Федераль проектлары нәтиҗәсендә мөмкин булды. Иске Чүпрәледә яшәүчеләргә тагын нинди Яңа ел сюрпризлары әзерләгәннәр? Болар хакында Фәнис Мөхәммәтов репортажында.
Яңа ел чыршысының беренче гирляндалары-балалар өчен генә көтеп алынган вакыйга түгел. Паркны яңартуда авылда яшәүчеләр үзләре дә катнашты. Паркның нинди булачагы турында тәкъдимнәрен җиткерделәр.
Төзүчеләр эшкә җәен керешкәннәр. Беренче чиратта парк мохитын саклап калу, анда уңайлы шартлар тудыру, территорияне функциональ тулыландыру бурычы торды. Хәзер биредә баскетбол, волейбол, мини-футбол өчен спорт мәйданчыклары, урам тренажерлары зонасы бар. Проектны тормышка ашыру барышында җәяүлеләр юлларын төзекләндерүгә аерым игътибар бирелгән.
Әлеге тантана белән Яңа ел чыршылары ачылуга старт бирелде. Район үзәгендә генә түгел, берничә ел инде район җирлекләре иң яхшы Яңа ел бизәлеше буенча республика конкурсында җиңеп килә. Кече Чынлы авылында да чыршы бизиләр, боздан әкият геройларын ясыйлар. ә Иске Чүпрәледә Кар кызы моңарчы күрелмәгән тамашага әзерләнә.
Ел дәвамында күп эшләнде, парклар яңартылды, мәктәпләр, клублар ремонтланды. Барысы да республика программалары ярдәмендә гамәлгә ашырылды. Авылларны үстерүдәге булышлыгы өчен президент Рөстәм Миңнехановка рәхмәтебез зур.
Узып баручы елда «Уңайлы шәһәр мохите формалаштыру» төбәк һәм «Торак һәм шәһәр мохиты» илкүләм проектлары буенча 57 парк, сквер яңартылды. Моңа миллиард сумнан артык акча тотылган. Чүпрәле районында 3 парк төзекләндерелгән.
Дмитрий Второв, Владимир Юрков, Татарстан яңалыклары, Чүпрәле районы.
