Яңа елны каршылау мәҗлесенең бизәге булган чыршыны кайдан сайлап алырга? Бүген Казан базарларында чыршы ярминкәләре башланды. Ылыслы агачлар — гадәти һәм зәңгәр чыршы, нарат башкалабызның барлык районнарында – барлыгы 28 урында сатыла.
Бу юлы Яңа ел чыршыларын бертавыштан сйлап алдылар. Урманчылардан торган конкурс комиссиясе башта – иң биек, купшы агачларны, башка агачлар янәшәсендә үскән чыршыларны кисә башлый.
Урманда матурлык конкурсы – үзенчәлекле. Корый башлаган ылыслы агачларның аскы өлешен малларга азык өчен дә кисәләр. Ә өске ягы яңа ел чыршысы буларак, сатуга китә.
Көн саен Матюшино урманчылыгы йөз чыршы сата. Чыршыларны кисүгә, газель машиналарына төяп. сәүдә урыннарына китерәләр. Бу урманчылыкта гына да Яңа ел бәйрәмнәренә меңләгән чыршы сату планлаштырыла.
Ылыслы агачлар бер метрдан югарырак, өстәвенә, күркәләрнең булуы мөһим –аларга сорау зур. Күркәле агачларны махсус заказ буенча кисәләр. Бу агачларның бәясе мең өч йөз сумнан башлана.
Базарларда Яңа ел чыршысын сайлаганда, әле яңа гына киселгән булулары шарт. Мондый ылыслы агачлар озаграк формада тора. Чыршыны сындырып карарга да ярый – яңа киселгән агач тиз генә сынмый. Димәк ылыыслары озаграк саклана.
Бу критерийлар теләсә кайсы чыршыны сайлап алганда мөһим. Чыршы озаграк һәм матур булып саклансын өчен, аларны җылыту приборларыннан ераграк тотарга кирәк.
Яңа ел чыршыларын сайлаганда, аларның саклану вакытына да игътибар итәргә кирәк. Белгечләр зәңгәр чыршыга өстенлек бирә. Ул башкаларга караганда, купшы булып озаграк тора. Ә төбе баллы суга куелган чыршылар болай да озаграк саклана.
Бүгеннән Казан базарларында чыршы, нарат, зәңгәр чыршы сатыла башлады. Сату урыннары – егерме сигезәү. Алар Идел буе, Совет, Киров, Вахитов, Авиатөзелеш, Яңа Савин, Мәскәү районнарында, кыскасы барлык урыннарда сатыла. Чыршы һәм нарат бәяләре – биш йөз сумнан, зәңгәр чыршы мең сумнан башлана.
Айнур Вәлиәхмәтов, Дамир Мөхәммәтханов, Татарстан яңалыклары.
