Календарьдагы һәр бәйрәм-кешеләргә һәм аларның проблемаларына игътибар итү өчен өстәмә сәбәп. Декабрьнең беренче ункөнлегендә мөмкинлекләре чикләнгән кешеләргә аерым игътибар бирелә. Буа төбәгенең Казандагы якташлар җәмгыяте дә ел саен район җитәкчелеге белән берлектә хәйрия чаралары үткәрә. Бу хакта тулырак хәбәрчеләребез язмасында
Картлык шатлык түгел диләр. Бигрәк тә ялгызың гомер кичерергә калса. Өлкән кеше тәрбиягә генә түгел, җылы сүзгә, якты карашка да мохтаҗ. Шушы көннәрдә Якташлар җәмгыяте президенты Ирек Закиров район башлыгы Ранис Камәртдинов белән Буа шәһәренең картлар һәм инвалидлар интернат-йортында булды.
Кадер-хөрмәттә яшәгән өлкәннәр өчен кунаклар тансык. Пандемия чорында, аралашу мөмкинлеге булмады.
Интернат җитәкчелеге ярдәмгә мохтаҗлар өчен сәламәтлекне ныгытуга юнәлдерелгән яңа алымнары белән таныштырды. Буа районы якташлар җәмгыяте эшчәнлегендә хәйрия чаралары аерым игътибар үзәгендә дип белдерде Ирек Закиров.
Өлкәннәрнең яшәү һәм тернәкләндерү шартлары белән танышканнан соң кунаклар Мулланур Вахитов исемендәге гимназиядә булды.
Буа районында Инклюзив белем бирү моделе кулланыла торган бердәнбер белем йорты. Кунаклар мөмкинлекләре чикләнгән балаларның дәресләрен, грант акчасына төзекләндерелгән спорт мәйданчыгын карады.
Үзе дә шушында белем алган Ирек Закиров өчен әлеге мәктәп укучыларының уңышларга ирешүе аеруча кадерле. Гимназия директоры мөмкинлекләре чикле балаларның конкурсларда призлы урыннар алуын билгеләп үтте. Нәкъ шул балаларга атап гимназия директорына район һәм Татарстан республикасының Иҗтимагый палатасы исеменнән акчалата сертификатлар тапшырды.
Мөршидә Җиһан, Гакил Камалетдинов. Татарстан яңалыклары.
