“Чулпан” мәдәният үзәгендә Татарстанда беренче тапкыр үткәрелә торган “Әпипә” Бөтенроссия татар халык биюе бәйгесенең финалы үтте. Тулырак мәгълүмат хәбәрчебез язмасында.
Бәйгедә 50дән артык ансамбль катнашкан булса, финалга шуларның яртысы килеп җиткән . Жюри үзэшчәннәрнең кием рәвешенә, бию техникасына, эчтәлегенә аеркча нык игътибар итте, киңәш- табышлары белән уртаклашты. Пермь краеның «Бәйрәм» ансамбле «Без булдырабыз» дип аталган композиция тәкъдим итте. Жюри әгъзалары чыгышның җырлы-биюле, драматургияле булуын ассызыклады.
Әлеге бәйге татар халык биюенең нинди дәрәҗәдә булуын күрсәтте дип саный белгечләр. Милли биюнең үзенчәлекләрен саклап калу гына түгел, аны заман рухында үстерү дә бик мөһим бурыч булып тора. Бию киемнәренең үзенчәлекләрен дә дөрес күрсәтергә кирәк. Ә инде биючеләргә килгәндә, алар бии-бии остара.Димәк,мондый бәйге-фестивальләр дә алда даими булып торырга тиеш.
«Әпипә» бәйгесе Бөтендөнья татар конгрессының башкарма комитеты, Татарстанның Мәдәният министрлыгы һәм «Татарстан — Яңа гасыр» телеканалы белән берлектә уздырылды. Ә аның төп максаты — халыкның мәдәни мирасын баету, татар халык биюен саклау, үзешчән бию коллективларының башкару осталыгын камилләштерү һәм аларга булышу.
Искәндәр Гыймалтдинов, Таһир Хәсәнов, Татарстан яңалыклары.
