Салкын кышларга кереп барганда, без иң җылы һәм якты бәйрәмнәрнең берсен — Әниләр көнен билгеләп үтәбез. Бу көн, кадерле әниләргә хөрмәт һәм яратуыбызны белдерү, җәмгыятьтәге ролен таныту өчен бер форсат ул ди, “ Наз “иҗтимагый хәйрия оешмасы җитәкчесе Нурания Сәйфетдинова. “Наз”ның назы кемнәргә юнәлгәнен хәбәрчебез Мөршидә Җиһан белә.
Кыска гына әни сүзе үзендә күпме йөрәк җылысы, ярату һәм наз саклый. Наз димәктән, “Наз”иҗтимагый хәйрия оешмасы сәламәтлеге чикле, ятим, яисә күп бала тәбияләүче әниләрне җыеп ел саен бәйрәм оештыра.
Бүген корьән уку мәҗлесе итеп оештырылган табын янына Кайбыч һәм Биектау районы әниләре җыелды. Вәгазь, нәсихәтләр тыңлаудан тыш кайбер әниләр тәҗрибәләре белән уртаклашты. Үзе тапкан 4 баласын һәм балалар бакчасында йөзләгән нарасыйны тәрбия кылучы Лилия Ибраһимованың киңәшләре аеруча игътибарга лаек.
Биектау районыннан килгән әниләр арасында Чулпан Агадуллина да бар. Ул авыру бала тәрибияләү өстәвенә, Бөтенроссия инвалид балалар әти-әниләре оешмасының Татарстан бүлекчәсендә иң активларның берсе дә.
Чулпан ханым искәртүенчә аларны бирегә Биектау районының «Өмет» халыкка социаль хезмәт күрсәтү үзәге чакырган. Әлеге үзәк “Наз” хәйрия фонды белән күптән хезмәттәшлек итә , шул дуслыкны рәхмәт хаты белән дә ныгытып куйдылар. Шулай ук Кайбыч районы исеменнән дә шундый ук рәхмәт сүзләре язылган хат һәм Кайбыч сырхауханәсе исеменнән аерым бүләк тапшырылды.
28 ел шәфкать туташы булып эшләгән Фәния Җәләлиева һәм аның белән бергә килгән хезмәттәшәре пандемия башланган көннәрдән үк район хастахәнәсендә авыруларны дәвалауга үз өлешен кертә. Алар өчен бүгенге бәйрәмдә катнашу да зур бүләк. Ул бүләктә “Наз” оешмасы белән берлектә Кәрим Тинчурин театрының да өлеше зур.
Тинчурин театры артистлары ул көнне тамашачыларга, шул исәптән әниләргә багышлап Аяз Гыйләҗев әсәре буенче куелган Өч аршин җир спектален күрсәтте.
Бәхет төшенчәсенең кыйммәтен белгән әниләр өчен әлеге спектакль дә аеруча гыйбрәтле булды.
Мөршидә Җиһан Таһир Хәсәнов.Татарстан яңалыклары.
