Республика районнарында ветераннар арасында «Балкыш» 7 нче Республика үзешчән сәнгать фестивале башлана. Татарстан Дәүләт Советы рәисе Фәрит Мөхәммәтшин фестивальне оештыру комитеты утырышын уздырды. Анда масштаблы мәдәни форум турында фикер алыштылар.
Быел фестиваль республика Ветераннар советының 35 еллыгына багышлана. 6 ел эчендә сәхнәдә 100 меңгә якын ветеран чыгыш ясаган.
Коллективлар иҗатларын төрле жанрларда күрсәтә — җырлыйлар, бииләр, шигырьләр сөйлиләр. Ноябрь ахырына кадәр сайлап алу этаплары уза. Март аенда Татарстанның 7 шәһәр һәм районында зона ярышлары планлаштырылган. Ә апрель аенда иң яхшы иҗат коллективлары республика башкаласында Гала-концертта катнаша.
«Балкыш» фестивале жюриен Россиянең һәм Татарстанның атказанган мәдәният хезмәткәре, «Татарстан» дәүләт телерадиокомпаниясе радиотапшырулар хезмәте җитәкчесе Тәүфыйк Сәгыйтов җитәкли. Фәрит Мөхәммәтшин сүзләренә караганда, ветераннар хәрәкәтен популярлаштыруда элеккечә үк массакүләм мәгълүмат чаралары зур роль уйный. Ә фестиваль үзе мөһим социаль әһәмияткә ия.
Алия Галиуллина, Дмитрий Второв, Никита Гоаханцев, Татарстан яңалыклары.
