Татарстанның Милли музеенда «Анатолиянең сәлжүк мөнбәрләре: ислам сәнгатенең гүзәл үрнәкләре» фотокүргәзмәсе эшли башлады. Күргәзмә Төркия Республикасының Казандагы Генераль Консуллыгы белән берлектә оеша. Анда сәнгать белгече Лилия Саттарованың һәм Әнкара фотографы Исмаил Хәйкырның фәнни тикшеренү проекты кысаларында, 2015-2021 елларда Төркиянең төрле шәһәрләрендә ясалган 40 фотосурәте урнаштырылган.
Борыңгы бабаларыбызның зәвыгын саклаган күргәзмәдән Ләлә Зәйнуллинаның махсус репортажы.
Исмәт Эрикан Төркиянең Казандагы генераль консулы
Урта гасырларда мөнбәр җомга көннәрендә мөселманнарның җыелып бергә намаз укып һәм вәгазь тыңлау урыны була. Рухи һәм дөньяви тормышны гәүдәләндергән мөнбәр үз чорының иң яхшы осталары тарафыннан кыйммәтле агач төрләреннән ясала. Аның бай декоры Ислам орнаментының барлык формаларын үз эченә алган.
Исмаил Хайкыр Төркия фотографы
Милли музейдагы күргәзмәгә узуга Төркиянең Җәмигъ мәчете мөнбәре фоторәсемнәре күзгә чалына. Мөнбәрнең төп нөсхәсе — Әнкара Этнографик музеенда саклана. ул анда 1934 елда китерелә. Мөнбәрнең каллиграфик тасмаларына төзелү вакыты һәм Корьәннән аятләр язылган. Иң борынгы мөнбәр сигез гасыр элек эшләнгән дип санала. Аларның күбесе Үзәк һәм Көнчыгыш Анатолии шәһәрләре мәчетләрендә әле дә хезмәт итә.
Ленар Хәкимҗанов Татарстан Республикасы мәдәният министры урынбасары
Күргәзмәдә шулай ук Алтын Урда чорындагы Болгар шәһәре биналарының архитектура декоры фрагментларын да күрергә мөмкин. Татарстан Республикасы Милли музее җыелмасыннан булган төрле төстәге мозаика һәм сырлап ясалган гипс үрнәкләрендә Ислам орнаменты үзенчәлекләре күренә.
Илфар хәзрәт Хәсәнов Татарстан мөфтиенең беренче урынбасары
Ислам дөньясы сәнгате – ул төрле халыклар традицияләренең үзара бәйләнеше нәтиҗәсендә, ундүрт гасыр дәвамында формалашкан уникаль мирас.
Рөстәм хәзрәт Хәйруллин “Гаилә” мәчете имам-хатыйбы
Төркиянең агачтан сырлап ясалган мөнбәрләре — бу мирасның искиткеч бер өлеше. Алар безнең көннәргә кадәр сакланып калуы белән кыйммәтле. Күргәзмә 17 декабрьгә кадәр эшли.
Ләлә Зәйнуллина, Таһир Хәсәнов. Татарстан яңалыклары.
