Чаллыда ковид йогышы белән авыручыларны шәһәрдәге бишенче хастаханәдә дәвалыйлар. Барлык бүлекләр дә ковид госпитале итеп үзгәртелгән. Палатаалар авырулар белән тулы диярлек. Пациентларның күбесе –өлкән яшьтәгеләр. Кызыл зонадан хәбәрчебез репортажы.
Александр авыр сулыш ала, коронавирус белән ничек авырганын искә төшерә. Пенсионер сәламәт яшәү рәвеше алып барган, ә чирне йоктыргач, вирусның бик куркыныч икәнлегенә төшенгән.
Хастаханәдә өлкәннәр, чыннан да, күп. Менә бу хатын ире белән бергә авырган, бергә дәваланганнар, тик иренең гомере вакытсыз өзелгән.
Ә монысы тернәкләндерү бүлеге. Каты авырулар арасында өлкәннәр күп. Аларны ясалма сулыш алу аппаратаы коткара. Валентина Ивановна да берничә көн шушы аппараттан файдаланган.Ул көннәрне куркыныч төш кебек искә ала.
Чаллыдагы 5нче хастаханә тулысынча ковид госпитале итеп үзгәртелгән. Монда 380 ятак исәпләнә, 90 проценты авырулар белән тулы. Табиблар бик киеренке эшли. Иң авыры – авыруларның туганнарына кайгылы хәбәр җиткерү, моны төрлечә кабул итәләр.
Гөлназ кызыл зонадагы коллегалары белән кешеләр гомерен коткарып калуда уяу эшли. Һәр пациент табибларның якын туганына әйләнә. Авырулар тизрәк дәваланып терелсен өчен, күп вакытларын хастаханәдә үткәрергә туры килә. Алар өчен яңадан яшәүгә әйләнеп кайткан кешеләрнең рәхмәт сүзеннән дә кадерлерәге юк.
Алмаз Хәкимов, Никита Граханцев, Татарстан яңалыклары, Чаллы.
