Казанда ковидтан тагын бер прививка ясату пункты ачылды. Тәүлек буена эшәүче пункт 7 нче клиник хастаханәсе территориясендәге мобиль комплекста урнашкан.Алдан язылырга кирәкми. Эшләми торган ял көннәрендә вакцина ясатырга теләүчеләргә яңа мөмкинлек барлыкка килде.
Эшләми торган ял көннәрендә, башкала урамнары гадәттәгедән бушап калды. Транспорт бөкеләре дә азайды. Мәктәп укучылары-каникулларда, студентлар – дистанцион белем ала. Ковидтан прививка ясатмаган алтмыш яшьтән өлкәнрәкләр үзизоляциядә булырга тиеш. Тик бу режимны барысы да үтәми.
Коар-код булганда, элеккечә үк сәүдә, фитнес — үзәкләренә, кафеларга эләгергә мөмкин. Тик төнге сәгать 11гә кадәр генә. 15 нче ноябрьдән кинотетарларга, театрларга, циркка да коар-код белән генә керергә мөмкин. Ковидтан саклану чараларын Роспотребнадзор вәкилләре тикшерә. Чаллыда, мәсәлән, биш оешмада закон бозу очраклары ачыкланган.
Эшләми торган ял көннәре ковидтан прививка ясату өчен менә дигән вакыт. Эш бирүчедән рәсми вакыт сорап торырга да кирәкми. Якында урнашкан вакциналаштыру пунктына килеп, прививка ясатуның бернинди кыенлыгы да юк.
Республикада вакциналаштыру пунктлары-171гә җитте. Соңгысы җиденче клиник хастаханә территориясендә ачылды, ул тәүлек буена эшли.
Битлек режимын үтәүне дә күзәтәләр. Җәмәгать транспортында тикшерү рейдлары дәвам итә. Тәртип бозучылар да җитәрлек. Мондый катгый чикләүләр эпидемиологик хәл яхшырганчы бара. Ә әлегә ял атнасы. Шушы мөмкинлектән файдаланып, вакытында прививка ясатып өлгерергә, үзебезнең дә, якыннарыбызның дә сәламәтлеге турында вакытында кайгыртырга кирәк. Табиблар шундый киңәш бирә.
